19ـی ئەم مانگە ئازەربایجان ئۆپەراسیۆنێكی سەربازی بەناوی "دژەتیرۆر" دەستپێکرد
رووداو دیجیتاڵ
لەبەردەم باڵەخانەی سەرۆکوەزیرانی ئەرمینیا لە یەریڤانی پایتەخت خۆپێشاندان کرا، زۆرینەی ئەرمینییەکان سەبارەت بە هێرشی ئازەربایجان لە سەرۆکی حکومەتەکەیان تووڕەن و بە ترسنۆک وەسفی دەکەن، داوای لێدەکەن دەست لەکار بکێشێتەوە. ئازەربایجانیش هێرشەکانی بە بەرەنگاریی تیرۆر ناودەبات.
مادلین، هاووڵاتی ئەرمینییە لەبارەی سەرۆکوەزیرانی وڵاتەکەیەوە دەڵێت "لە 2018ـەوە پاشینان، سەرۆکوەزیرانمانە و جگە لە شکست و نەهامەتی، هیچ شتێكی بۆ ئێمە نەکردووە. پاشینان بە روونی بە خەڵکی قەرەباخی گوتووە، ئەوان ناتوانن پشت بە ئەرمینیا ببەستن و ئێمەش هەرگیز ئەوە قبووڵ ناکەین."
رۆژی 19ـی ئەم مانگە ئازەربایجان ئۆپەراسیۆنێكی سەربازی بەناوی "دژەتیرۆر" دەستپێکرد و ئامانجەکەی بە "کۆتاییهێنان بە جووداخوازە ئەرمینییەکان" دیاریکرد.
ئەنوەر ئەیڤازۆڤ، گوتەبێژی وەزارەتی بەرگریی ئازەربایجان رایگەیاند "چەند جووڵەیەکی ئەرمینیامان لە ناگۆرنۆ قەرەباخ بەدیکردووە وەک؛ ناردنی یەکەی سەربازی و زیاترکردنی هەوڵە هەواڵگرییەکانیان لە ئاست سوپای ئازەربایجان. ئەوان بەنیازی کردەی تیرۆریستین و ئێمەش بە ئۆپەراسیۆنی دژەتیرۆر وەڵامیان دەدەینەوە."
هەرچەندە ئازەربایجان باسی بەئامانجکردنی خاڵی سەربازی و هەواڵگری تایبەت دەکات؛ بەڵام لەنێو ئەرمینییەکانی هەرێمەکەدا؛ کوژراو و برینداری سیڤیلیش هەن.
ڤاردین، دانیشتووی هەرێمی ناگۆرنۆ قەرەباخە و قوربانیی گرژییەکانی ئەو دوو وڵاتەیە، دەڵێت "لەنزیک گردێکی تەنیشت ماڵەکەمان بووین، کاتێکمان زانی تەقینەوەیەک روویدا، من و خوشکەکەم و کچە دراوسێکەمان بریندار بووین."
هەرێمی ناگۆرنۆ قەرەباخ دەکەوێتە نێو سنووری ئازەربایجان و بە سوپای ئەو وڵاتە دەوردراوە و تەنیا رێگەیەکی بەرتەسکی شاخاوی هەیە بەناوی "رێڕەوی لاچین" کە هەرێمەکە بە وڵاتی ئەرمینیا دەبەستێتەوە. ئازەربایجان بانگەشەی خاوەنداریێتی دەکات و ئەرمینیاش، کە هەرێمەکە بە "ئارتساخ" ناودەبات بە بەشێكی دانەبڕاوی خۆی دادەنێت.
لە هەشتاکانی سەدەی رابردووەوە چەندین شەڕ و پێکدادان لەنێوان ئازەربایجان و ئەرمینیا لەسەر ئەو هەرێمە روویانداوە و هەزاران کوژراو و دەیان هەزار بریندار و ئاوارەیی لە هەردوولا لێکەوتووەتەوە. دوایینیان لە ئەیلوولی 2020 بوو کە شەش هەفتەی خایاند و بە رێککەوتنێكی ئاگربەست بە نێوەندگیریی رووسیا کۆتاییهات و هێزی ئاشتیخوازی رووسی بە ناوچەکەدا بڵاوکرانەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ