لە هیندستان بەهۆی سەربڕینی مانگایەک بۆ جەژن، هیندۆسەکان هێرشدەکەنە سەر دووکانی موسڵمانێک

 

رووداوەکە لە شارۆچکەی ناهان لە هەرێمی هیمچال پرادێش روویداوە. ئەو موسڵمانە ناوی جاڤیدە، وێنە و ڤیدیۆی ئەو مانگا سەربڕاوەی لە ستۆریی خۆی لە واتسئاپ بڵاوکردووەتەوە و هیندۆسەکانی تووڕە کردووە. لە ڤیدیۆیەکی بڵاوکراوەدا دەردەکەوێت گرووپێک هیندۆس بە تووڕەییەوە دەرگای دووکانەکەی دەشکێنن و جلوبەرگی نێو دووکانەکە پەرش و بڵاو دەکەنەوە. ئەمە لە کاتێکدایە کە پۆلیس لە شەقامەکە ئامادەن و دوای ئەوەی دووکانەکە زیانێکی زۆری پێدەگات، ئینجا بڵاوە بە خەڵکەکە دەکەن.

 

گرووپە هیندۆسەکە هەروەها هۆشدارییان داوەتە هاووڵاتییانی ناوچەکە دووکان و ماڵ بە کرێ نەدەنە موسڵمانەکان، ئەگەر بە کرێشیان داوە زوو لێیان وەرگرنەوە. گرووپەکە لەلای پۆلیس سکاڵایان کردووە و دەڵێن، سووکایەتی بە بیر و باوەڕیان کراوە و داوای گرتنەبەری رێوشوێنی تووند دەکەن.

 

گرووپی (ئانجومان ئیسلامیا) گرووپێکی موسڵمانی ئەو شارۆچکەیەن و سەرکۆنەی بڵاوکردنەوەی وێنەی سەربڕینی مانگاکەیان کردووە و داوایان کردووە حکومەت هەنگاو لە دژی جاڤید بگرێتەبەر.

 

لە ڤیدیۆیەکی دیکەی بڵاوکراوەی تۆڕی کۆمەڵایەتیی ئێکس دەردەکەوێت، کۆمەڵێک ژن و پیاوی تووڕە بە شەقامەکانی شارۆچکەکە خۆپیشاندان دەکەن و بەهاوارەوە دروشم دەڵێنەوە.