وەزارەتی دەرەوەی ئەمریکا بۆ رووداو: لە بەرامبەر سزاکانمان بۆ سەر ئێران داوای لێبوردن ناکەین

 

محەممەد جەوادزەریف، وەزیری دەرەوەی پێشووی ئێران رایگەیاندبوو ئەمریکا بەرپرسیاری کەوتنە خوارەوەی هێلیکۆپتەرەکەی رەئیسییە، ئەویش بەهۆی سزاکانی ئەمریکا بۆ سەر کەرتی فڕۆکەوانیی وڵاتەکە، کە ناتوانێت دەستی بە پارچەی یەدەگ رابگات.

 

رۆژی دووشەممە، 20-05-2024، ماتیو میلەر، گوتەبێژی وەزارەتی دەرەوەی ئەمریکا لە کۆنفرانسی رۆژنامەڤانیی رۆژانەیدا بە دیار کوردە، بەڕێوەبەری نووسینگەی تۆڕی میدیایی رووداوی لە واشنتن راگەیاند: "پێش هەموو شتێک ئێمە داوای لێبوردن لەبارەی سزاکانمان بۆ سەر ئەو دەسەڵاتە ناکەین. حکومەتی ئێرانی فرۆکەکانی بۆ پشتیوانیکردنی تیرۆر بەکارهێناوە. ئێمە بەردەوام دەبین لە جێبەجێکردنی تەواوی سزاکانمان بەتایبەتی سزاکانمان لە بواری فرۆکەوانیدا." 

 

گوتەبێژی وەزارەتی دەرەوەی ئەمریکا هۆکاری کەوتنەخوارەوەی هێلیکۆپتەرەکە دەخاتە ئەستۆی حکومەتی ئێران: "لە کۆتاییدا ئەمە بەرپرسیارێتیی حکومەتی ئێرانە لەو بڕیارەی کە هێلیکۆپتەرێکی تەمەن 45 ساڵ لە کەشوهەوایێکی نالەباردا بەکاربهێنێت، نەک لایەنەکانی دیکە." 

 

لەبارەی ئەو راپۆرتە میدیایانەی کە باس لە گفتوگۆی راستەوخۆی نێوان ئەمریکا و ئێران لە عومان دەکەن، ماتیو میلەر، بە رووداوی راگەیاند: "من نامەوێت لەسەر ئەو پرسانە قسە بکەم و لەمێژە روونمانکردووەتەوە ئێمە توانای ئەوەمان هەیە پەیام بۆ ئێران بنێرین هەرکاتێک لە بەرژوەدیمان بێت ئەو کارە بکەین، بەڵام قسە لەسەر ئەوە ناکەم."

 

گوتەبێژی وەزارەتی دەرەوەی ئەمریکا ئاشکرای کرد، ئێران داوای لێکردوون هاوکارییان بکەن لە دۆزینەوەی هێلیکۆپتەرەکەی سەرۆکی پێشووی ئێران ئیبراهیم رەئیسی. میلەر "لەلایەن حکومەتی ئێرانەوە داوای هاوکاریمان لێکرا. ئێمە وەڵاممان ئەوە بوو کە ئامادەی هاوکاریکردنین. ئەمە کارێکە ئێمە دەیگیرنەبەر بەرامبەر هەر حکومەتێک لەو دۆخەدا بێت. بەڵام دواجار بە هۆکاری لۆجستی نەمانتوانی ئەو هاوکارییە دابین بکەین." 

 

یەکشەممە، 19-05-2024، لەکاتی گەڕانەوە لەسەر سنووری ئازەربایجانەوە بۆ شاری تەورێزی ناوەندیی پارێزگای ئازەربایجانی رۆژهەڵاتی ئێران، هێلیکۆپتەرەکەی ئیبراهیم رەئیسی، سەرۆککۆماری ئێران کەوتەخوارەوە و تێکشکا. بەهۆیەوە سەرۆککۆماری ئێران، وەزیری دەرەوە، پارێزگار و ئیمام جومعەی تەورێز و پێنج سەرنشینی دیکەی فڕۆکەکە گیانیان لەدەستدا.