سکرتێری گشتیی ناتۆ بۆ رووداو: پێویستە رێگەنەدەین پووتین سەربکەوێت

 

مارک رووتە پێش دەستپێکردنی کۆبوونەوەی وەزیرانی بەرگریی یەکێتیی ئەورووپا لە برۆکسل، ئەمڕۆ (سێشەممە، 19-11-2024) قسەی بۆ رۆژنامەڤانان کرد. 

 

لە وەڵامی پرسیارێکی زنار شینۆ، پەیامنێری رووداو، سکرتێری گشتیی ناتۆ گوتی "زۆر شانازی بەو کارەوە دەکەم کە ئۆکراینا لەپێناو سەرکەوتندا کردوویەتی، لەکاتێکدا چوار جار لە رووسیا بچووکترە و ئابوورییەکەی تەنیا دەکاتە 25٪ـی ئابووریی رووسیا."

 

سکرتێری ناتۆ هەروەها بە رووداوی گوت "رووسیا نەیتوانی سەربکەوێت، چونکە ئێمە لە رۆژئاوا و ئەوانی دیکەی سەرانسەری جیهان، ئامادە بووین ئەو شتانەی پێویست بوون بۆ ئۆکراینا دابین بکەین تاوەکو سەربکەوێت و، رێگری لە سەرکەوتنی پووتین بکات."

 

رووتە پێیوایە "گرنگە پووتین سەرنەکەوێت." و دەڵێت "ئەگەر وابێت، رووسیایەکی بەهێزتر لەسەر سنوورەکانمان دەبێت، بە رووبەر و توانای سەربازیی زیاترەوە. من بڕوای تەواوم هەیە بەوەی، رووسیا لەوێ ناوەستێت، بەڵکو دەبێتە هەڕەشەیەکی مەترسیدار بۆ سەر هەموومان لە رۆژئاوا. بۆیە پێویستە رێگریی لێبکەین، چونکە بەهاکانمان لە مەتریسدان، هەروەها سەلامەتیی هەموومان لە مەترسیدایە."

 

 

مارک رووتە، سکرتێری گشتیی ناتۆ: لە 2014، رووسەکان کریمیایان گرت، دواتر جەنگ دەستیپێکرد. هێرشە سەرتاسەرییەکە لە کۆتایی شوباتی 2022 دەستیپێکرد، واتە هەزار رۆژ لەمەوبەر. زۆر شانازی بەو کارەوە دەکەم کە ئۆکراینا لەپێناو سەرکەوتندا کردوویەتی، لە کاتێکدا چوار جار لە رووسیا بچووکترە و ئابوورییەکەی تەنیا دەکاتە 25٪ـی ئابووریی رووسیا. رووسیا نەیتوانی سەربکەوێت، چونکە ئێمە لە رۆژئاوا و ئەوانی دیکەی سەرانسەری جیهان ئامادە بووین ئەو شتانەی پێویست بوون بۆ ئۆکراینا دابینی بکەین تاوەکو سەربکەوێت و، رێگری لە سەرکەوتنی پووتین بکات. بۆچی گرنگە پووتین سەرنەکەوێت؟ چونکە ئەگەر وابێت، رووسیایەکی بەهێزتر لەسەر سنوورەکانمان دەبێت، بە رووبەڕ و توانای سەربازیی زیاترەوە. من بڕوای تەواوم هەیە بەوەی، رووسیا لەوێ ناوەستێت، بەڵکو دەبێتە هەڕەشەیەکی مەترسیدار بۆ سەر هەموومان لە رۆژئاوا. بۆیە پێویستە رێگریی لێبکەین، چونکە بەهاکانمان لە مەتریسدان، هەروەها سەلامەتیی هەموومان لە مەترسیدایە. بۆیە پێویستە دڵنیابینەوە لەوەی ئۆکراینا سەردەکەوێت، ئەوە تەوەری یەکەمی ئەجێنداکەمانە، بە تایبەتی بەهۆی تێوەگلانی کۆریای باکوور و هێرشە ئاسمانییە گەورەکەی کۆتایی هەفتەی رابردوو.