جیب یەکەمین ئۆتۆمبێلی کارەبایی خۆی رادەگەیێنێت

 

ئۆتۆمبێلە نوێیەکە کە بە ناوی Avenger "ئەڤێنجەر"ـەوەیە، دەتوانێت بە بەکارهێنانی وزەی کارەبای کۆگاکراو، واتە بێ بەنزین و سووتەمەنی، 400 کیلۆمەتر ببڕێت، واتە پاتریەکەی بەشی ئەوە دەکات لە هەولێرەوە بچی بۆ دهۆک و بگەڕێیتەوە و هێشتاش چارەکێکی دەمێنێت. 

 

Jeep کە براندێکی ئەمریکییە و ئێستا لەلایەن کۆمپانیای فرەنەتەوەیی ستێلانتیسەوە خاوەندارێتیی دەکرێت، بە نیازە دوو ئۆتۆمبێلی دیکەی تەواو کارەبایی تاوەکو ساڵی 2025 بخاتە سەر شەقامەکانی ئەوروپا. 

 

لە پێشانگەی ئۆتۆمبێلی پاریس کە رۆژی دووشەممە بە بەشداریی ئیمانوێل ماکرۆن، سەرۆککۆماری فەرەنسا کرایەوە، کریستیان میونیەر، بەڕێوەبەری جێبەجێکاریی کۆمپانیاکە گوتی، ئەڤێنجەر بریتییە لە نموونەیەک لە شێوەی ئەو ئوتۆمبێلە کارەباییانەی کە کۆمپانیاکە بە نیازە بەرهەمیان بێنێت. 

 

پاتریی ئەڤێنجەر 54 کیلۆوات لە کاژێرێکدا بەرهەمدێنێت بۆ وەگەڕخستنی بزوێنەرێکی 400 ڤۆڵتی. 

 

براندەکە باس لەوە دەکات، ئۆتۆمبێلەکەیان دەتوانێت بە 3 خولەک بەشی 30 کیلۆمەتر هاژۆتن، پاتریەکەی بارگاوی بکرێتەوە. بە 20 خولەک بارگاویکردنەوە، پاتریەکەی لە 20٪ـەوە دەگاتە 80٪. 

 

میونیەر گوتی: "Jeepی ئەڤێنجەری تەواو کارەبایی ئامانجیەتی بۆ رێگەی دەرەوە 400 کیلۆمەتر و لە نێو شاردا 550 کیلۆمەتر بڕوات."

 

هەر بە گوتەی بەڕێوەبەرە جێبەجێکارەکە، نوێترین تەکنەلۆجیای سەلامەتی و خۆهاژۆیی لە بەرهەمە نوێیەکەیاندا بەکارهێنراوە. 

 

ئاماژەی بەوەش کردووە، کۆمپانیاکەیان بە نیازە تاوەکو ساڵی 2030 هەموو ئۆتۆمبێلەکانی Jeep لە ئەوروپا بکرێنە کارەبایی.