کۆمەڵگەی کوردی لە ئەڵمانیا: ئەگەر مامۆستا دابین بکرێت، لە هەموو هەرێمەکانی ئەڵمانیا زمانی کوردی دەخوێندرێت

 

 

بەگوێرەی داتاکانی کۆمەڵگەی کوردی لە ئەڵمانیا، نزیکەی دوو ملیۆن کورد لەو وڵاتەدا دەژین، بەڵام 80%ی منداڵانی کورد لە خوێندنی کوردی بێبەشن. محەممەد تانریڤەردی، بەڕێوەبەری کۆمەڵگەی کوردی لە ئەڵمانیا لە کاتی بەشداریکردنی لە بەرنامەی نووڕۆژی تۆڕی میدیایی رووداو گوتی، لە کۆی 16 هەرێمی ئەڵمانیا، لە پێنج هەرێم زمانی کوردی بە فەرمی دەخوێندرێت و لە 11 هەرێمی دیکە زمانەکە ناخوێندرێت.

 

کۆمەڵگەی کوردی لە ئەڵمانیا داوای لە وەزارەتی پەروەردەی ئەڵمانیا کردووە، زمانی کوردی لە هەرێمەکانی دیکەشدا بخوێندرێت، بەڵام لە وەڵامدا داوای کردووە، ئەو نەتەوانەی کە خاوەن دەوڵەتن و دەیانەوێت لە ئەڵمانیا زمانەکەیان بخوێندرێت، دەوڵەتەکەیان خۆی مامۆستای زمانەکە دابمەزرێنێت و بینێرێتە ئەڵمانیا بۆ خوێندنی زمانەکە. بەڕێوەبەری خوێندنی کوردی لە ئەڵمانیا دەڵێت، "راستە ئێمەی کورد دەوڵەتمان نییە، بەڵام حکومەتی هەرێمی کوردستان فیدراڵییە و وەکو نیمچە دەوڵەتێکە و دەتوانێت هاوکار بێت و مامۆستا دابین بکات؛ دەشتوانێت لەگەڵ ئەو هەرێمانە هاوئاهەنگی بکات تاوەکو زمانی کوردی لە ئەڵمانیا بخوێندرێت."

 

محەممەد تانریڤەردی دەڵێت، "تورکیا، ئیسپانیا، بەریتانیا، ئیتاڵیا و یۆنان، پشتیوانیی دارایی دەدەنە ژمارەیەک مامۆستا؛ زمانەکانیان لە ئەڵمانیا دەخوێندرێت و منداڵانیان فێری زمانەکەیان دەبن، ناسنامەکەیان دەپارێزن، بەڵام ئەگەر کورد هاوکار نەبێت لەو بوارەدا هاوشێوەی ئەو وڵاتانە، زمانی کوردی دەکەوێتە مەترسییەوە و منداڵان فێری زمانی کوردی نابن و ئەگەری هەیە لە دواڕۆژدا شوناسی خۆیان لەدەستبدەن."

 

بەڕێوەبەری کۆمەڵەی کوردی دەڵێت، "دەکرێت هەرێمی کوردستان مامۆستای زمانی کوردی دابین بکات و پشتیوانیی دارایی بکرێن و پێداویستییەکانی قوتابخانەکانیش لەلایەن حکومەتی هەرێمی کوردستانەوە دابین بکرێت. بەمشێوەیە دەکرێت لە سەرجەم هەرێمەکان زمانی کوردی بخوێنرێت."

 

بەگوێرەی یاساکانی ئەڵمانیا هەرکاتێک نزیکەی 20 دایک و باوک داواکارییان ئاراستەی وەزارەتی پەروەردە کرد بۆئەوەی منداڵەکانیان بە زمانی خۆیان بخوێنن، حکومەت دەبێت بنەماکانی ئەو پەروەردەیان بۆ دابین بکات، بەڵام وەزارەتی پەروەردەی ئەڵمانیا بە کۆمەڵگەی کوردی ئەڵمانیای گوتووە، "ئێمە ناتوانین پشتیوانی دارایی بۆ خوێندنی کوردی لە سەرجەم هەرێمەکان دابین بکەین."