دیمەنی کۆبوونەوەکە لە میونشن، 18-2-2024
رووداو دیجیتاڵ
سه‌رۆكى هه‌رێمى كوردستان لە میونشن له‌گه‌ڵ سه‌رۆكوه‌زيرانى ئيستۆنيا كۆبووه‌وه، هه‌ردوولا جه‌ختيان له خواستى هاوبه‌ش بۆ بره‌ودان به په‌يوه‌ندييه‌كان له هه‌موو بواره‌كاندا كرده‌وه.
له كۆنفرانسى ئاسايشى ميونشن له ئه‌ڵمانيا، پێشنيوه‌ڕۆى ئه‌مڕۆ (يه‌كشه‌ممه، 18-2-2024) نێچيرڤان بارزانى، سه‌رۆكى هه‌رێمى كوردستان له‌گه‌ڵ كايا كالاس، سه‌رۆكوه‌زيرانى ئيستۆنيا، كۆبووه‌وه.
له كۆبوونه‌وه‌كه‌دا په‌يوه‌ندييه‌كان و هاريكاريى هاوبه‌شى ئيستۆنيا له‌گه‌ڵ عێراق و هه‌رێمى كوردستان به‌تايبه‌تى له بوارى ئه‌منيدا، رۆڵى هێزه‌كانى ئيستۆنيا له چوارچێوه‌ى هاوپه‌يمانيى نێوده‌وڵه‌تيى دژى داعش له هه‌رێمى كوردستان باس كرا و، تيشكيان خسته سەر دۆخى ئه‌منی و سياسيى عێراق و هه‌رێمى كوردستان.
هه‌ردوولا بەپێی راگەیێندراوی سەرۆکایەتیی هەرێمی کوردستان "جه‌ختيان له خواستى هاوبه‌ش بۆ بره‌ودان به په‌يوه‌ندييه‌كان له هه‌موو بواره‌كاندا كرده‌وه. هه‌ر له‌مباره‌يه‌وه به بايه‌خه‌وه باس له سه‌ردانى ناوه‌ڕاستى مانگى رابردووى سه‌رۆك ئالار كاريس، سه‌رۆکكۆمارى ئيستۆنيا و شاندى ياوه‌رى بۆ عێراق و هه‌رێمى كوردستان و كۆبوونه‌وه‌ى له‌گه‌ڵ نێچيرڤان بارزانى له هه‌ولێر كرا. لاى خۆيه‌وه سه‌رۆكى هه‌رێمى كوردستان سوپاسى رۆڵى هێزه‌كانى ئيستۆنياى له هه‌رێمى كوردستان كرد. "
گۆڕينه‌وه‌ى بيروڕا ده‌رباره‌ى دوايين پێشهاته‌كانى ره‌وشى ئاڵۆزى رۆهه‌ڵاتى ناوه‌ڕاست و شه‌ڕ له غه‌ززه و ئۆكرايينا و كاريگه‌رى و لێكه‌وته‌كانى، لايه‌نێكى ديكه‌ى كۆبوونه‌وه‌كه بوو.
ئیستۆنیا، وڵاتێکی بچووکی باکووری رۆژهەڵاتی ئەوروپایە و ژمارەی دانیشتووانی یەک ملیۆن و 331 هەزار کەسە.
ئیستۆنیا لە ساڵی 2014 بووە ئەندامی هاوپەیمانیی نێودەوڵەتی دژی داعش و یەکەیەکی سوپای ئەو وڵاتە کە لە 110 سەرباز و راوێژکار پێکهاتووە لە هەولێرن و ئەرکیان پاراستنی بنکە سەربازییەکان و وەڵامدانەوەی خێرایە.
ئەو وڵاتە لە ساڵی 2014ـوە بە ناردنی چەک یارمەتی پێشمەرگە و سوپای عێراقی داوە و نزیکەی 9 ملیۆن و 500 هەزار دۆلاریشی بۆ بواری مرۆیی، هەڵگرتنەوەی مین و سەقامگیری تەرخانکردووە.
کۆنفرانسی میونشن بە بەشداری چەندین سەرۆک و سەرکردەی وڵاتانی جیهان لە رۆژی هەیینی، 16ـی شوبات دەستیپێکرد، تێیدا تاوتوێی گرژییەکانی جیهان بە گشتی، جەنگی ئۆکراینا و رووسیا و شەڕی غەززە و ئاڵنگارییەکان و رێگریکردن لە پەرەسەندنی شەڕ و بەرقەرارکردنی ئاشتی دەکرێت.
رۆژی پێنجشەممە، 15ـی شوباتی 2024، بە مەبەستی بەشداریکردن لە کۆنفرانسەکە سەرۆکی هەرێمی کوردستان گەیشتە ئەڵمانیا و لە هەمان رۆژدا کۆبوونەوە و دیدارەکانی لەگەڵ سەرکردە و بەرپرسانی وڵاتان دەستیپێکرد.
دڵشاد شەهاب، گوتەبێژی سەرۆکایەتیی هەرێمی کوردستان، لە یەکەم رۆژی 60ـەمین کۆنفرانسی ئاسایشی میونشن بە رۆژنامەڤانانی گوت ''کۆنفرانسەکە بۆ گەیاندنی پەیامی هەرێمی کوردستان بە سەرکردەکان و ئەوانەی لەسەر ئاستی جیهان بەشداریی بڕیاردان دەکەن، زۆر گرنگە.''
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ