جیهان
سەربازێکی ئۆکراینی بە درۆن چاودێری سنوورەکان دەکات بۆ رێگری لە هەڵاتنی ئەوانەی نایانەوێت خزمەتی سەربازی بکەن
رووداو دیجیتاڵ
سەربازانی سوپای ئۆکراینان چاودێری سنوورەکانیان لەگەڵ مۆلدۆڤا دەکەن؛ بەدوای ئەو کەسانەوەن کە لە تەمەنی خزمەتی سەربازیدان و هەوڵی راکردن دەدەن.
دمیترۆ پتریسیا، سەربازی سنوور دەڵێت، "هەندێکجار، جلوبەرگی جێهێڵدراو دەدۆزینەوە. ئەمەش نیشانەی ئەوەیە کەسێک لەو ناوەیە و دەیەوێت هەڵبێت، یان ئامادەکاری دەکات بۆئەوەی دواتر بێتەوە و هەڵبێت. بەم جۆرەش دەزانین کە کەسێک بە نیازی هەڵاتن بێت."
ئەوانەی هەڵدێن، بەهۆی ترسیانە لەوەی ببرێنە بەرەکانی جەنگ. بەگوێرەی ئاماری یۆرۆستات، تاوەکو تەممووزی ئەم ساڵ، چوار ملیۆن و 100 هەزار ئۆکراینی لە وڵاتانی ئەورووپا بوون، 22%یان لە تەمەنی خزمەتی سەربازیدا بوون کە زۆرینەیان لە سنوورەکانەوە هەڵاتوون.
بۆ رێگریی زیاتر لە هەڵاتنی پیاوان، پاسەوانی سنوور سوود لە تەکنەلۆژیای پێشکەوتوو دەبینێت.
فەدیر پیتیاک، بەکارخەری درۆن دەڵێت، "هەندێک ناوچە هەن ناتوانین بۆیان بچین و ئۆتۆمبێلیش پێیان ناگات. ئەگەر هەر نیشانەیەک بدۆزینەوە، بەدواداچوونی بۆ دەکەین."
ئێستا ئۆکراینا زۆر پێویستی بە سەربازە. بەگوێرەی بەرپرسانی ئۆکراینا، بۆ بەردەوامیدان بەو جەنگە، پێویستیان بە 500 هەزار سەربازی دیکەیە.
بەو هۆیەوە نیسانی ئەم ساڵ ڤۆلۆدیمیر زیلینسکی، سەرۆکی ئۆکراینا تەمەنی چەکدارکردنی هاووڵاتییانی لە 27 ساڵییەوە کردە 25 ساڵی، بەم هەنگاوە نزیکەی 50 هەزار سەرباز بۆ سوپاکەیان زیاد دەبێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ