وێنەی ئەو کەشتییەی کە بە پێنج هەزار کتێبەوە لە بنغازی لەنگەری گرتووە
رووداو دیجیتاڵ
کەشتییەکی گەورە لە کەنار دەریای بنغازیی لیبیا بە پێنج هەزار کتێبەوە لەنگەری گرتووە، کە لەڕاستیدا کتێبخانەیە. کتێبەکانی کتێبخانەکە چەندین ناونیشانیان تێدایە و لە گەورە و پیر و منداڵ و گەنج جمەی دێت.
سەرپەرشتیارانی کتێبخانەکە دەیانەوێت خوێنەر بکەنە سەرکردە. لۆگۆس هۆپ ناوی کەشتییەکەیە و راندی گرێب، بەڕێوەبەری کتێبخانەکە دەڵێت، "دەربارەی ئەوەی لە گەورەترین پێشانگەی کتێبی لە جیهاندا بیت، بتوانیت یارمەتیی ئەو کەسانە بدەیت کە خوێنەرن بۆئەوەی ببنە سەرکردە و سەرکردەن بۆئەوەی ببنە خوێنەر، هەستێکی نایابە. بۆیە سوپاسی حکومەتی لیبیا و بنغازی دەکەین کە هاتنە ناو ئەم کۆمەڵەیەوە و هاوبەشییان کرد و دۆستایەتییان کرد، زۆر سەرنجڕاکێشە."
بەپێی ئەو داتایانەی لەلایەن دامەزراوەی ئاماری یونسکۆوە بڵاوکراونەتەوە چوار ملیۆن و 192 هەزار و 47 کەس لە لیبیا کە تەمەنیان لە 15 ساڵ زیاترە خوێندەوارن، لەوانەش دوو ملیۆن و 273 هەزار و 806 کەسیان لە رەگەزی نێرن و ملیۆنێک و 918 هەزار و 241 کەسیشیان لە رەگەزی مێن.
هەر بەپێی ئاماری یونسکۆ 400 هەزار و 93 کەسی سەروو تەمەن 15 ساڵ لەو وڵاتەدا نەخوێندەوارن، کە 322 هەزار و 983 کەسیان لە رەگەزی مێن و 77 هەزار و 110یان لە رەگەزی نێرن.
خەڵکێکی زۆر سەردانی کتێبخانەکە دەکەن و دەڵێن تینووی خوێندنەوە و کتێبن. محەمەد بوهمیدە، دانیشتووی شاری بنغازی دەڵێت، "بنغازی تینووی ئەم جۆرە چالاکییە کولتووریەیە، هەر کەسێک سەلیقەی خۆی هەیە کاتێک باس لە کولتوور و هەڵبژاردنی کتێب دەکرێت. سەردانێکی کولتووری و کۆمەڵایەتییە کە جۆرێکیشە لە کات بەسەربردن بۆ خەڵکی بنغازی. ئەمەش ئەوەیە کە بینیومانە و باشترین بەڵگەش هاتنی بەردەوامی رۆژانەی خێزانەکانە لە هەموو چین و توێژەکانی کۆمەڵگە."
کەشتییەکە ساڵی 1973 دروستکراوە و لە ساڵی 2009وە تاوەکو ئێستا پڕ کتێبە و بە دەریا و زەریاکاندا دەگەڕێت.
لە 60 وڵاتی جیهانەوە خۆبەخشان کار لەو کتێبخانەیە دەکەن و زیاتر لە پێنج هەزار ناونیشانی تێدایە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ