ئاگر لە دارستانەکانی مەسەدۆنیای باکوور
رووداو دیجیتاڵ
دارستانی نۆڤۆ سێلۆ لە باشووری مەسەدۆنیای باکوور، لە سەرەتای ئەم مانگەوە چەندینجار ئاگری تێدا کەوتووەتەوە. لە سەرەتای ئەم مانگەشەوە ئاگر لە مەسەدۆنیای باکوور زیاتر لە 100 هێکتار رووبەری دارستانی سووتاندووە.
ستۆینج ئانگیلۆڤ، بەڕێوەبەری ناوەندی رووبەڕووبوونەوەی قەیرانەکان لە مەسەدۆنیای باکوور دەڵێت، "ئاگرەکە زۆر گەورەیە و لە زۆر ناوچەی جیاجیاش هەیە. لە هەندێک ناوچە تیمەکانمان بە زەحمەت دەگەنە شوێنەکە، ئەوەش کۆنترۆڵکردنی ئاگرەکەی قورستر کردووە."
بەرپرسانی مەسەدۆنیای باکوور دەڵێن، ئێستا 12 ناوچە لە دارستانەکانی وڵاتەکە ئاگریان تێدایە؛ 133 کارمەندی ئاگرکوژێنەوەش هەوڵی کوژاندنەوەیان دەدەن.
لە سەرەتای ئەم مانگەوە نزیکەی 200 ئاگر لە دارستانەکانی ئەو وڵاتە کەوتوونەتەوە؛ بەو هۆیەوە زیاتر لە 100 هێکتار رووبەری دارستان سووتاوە.
ئەندرای پاڤالێچینکۆ، کارمەندی ئاگرکوژێنەوە ئاماژە بەوە دەکات، "لە 24 کاژێری رابردوودا هێلیکۆپتەرەکان توانیویانە 30 جار ئاو بڕژێنن و رووبەرێکی زۆر لە دارستانەکان لە سووتان بپارێزن، ئامێری پێشکەوتووش بەکاردەهێنین بۆ کۆنترۆڵکردنی ئاگرەکە."
یەکێتیی ئەورووپا زیاتر لە 550 کارمەندی ئاگرکوژاندنەوەیان بە سەرانسەری ئەو وڵاتانە بڵاوەپێکردووە کە ئاگریان تێدا کەوتووەتەوە، لەوانەش مەسەدۆنیای باکوور.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ