چوار کەس لە ئەڵمانیا بە تۆمەتی کوشتنی کۆچبەرێک لە تەنیشت پەرلەمانی هۆڵەندا دەستگیر کران
رووداو دیجیتاڵ
لە ئەڵمانیا چوار کەس دەستگیر کران کە پێشتر لە تەنیشت پەرلەمانی هۆڵەندا کۆچبەرێکیان کوشتبوو. ئەڵمانیا دەڵێت، کەسەکانی رادەستی پۆلیسی هۆڵەندی کردووە.
ئەو چوار کەسە لە شاری (رێمشاید) بە تۆمەتی بەشداریکردن لە کوشتنی کۆچبەرێک لە هۆڵەندا دەستگیر کراون.
مانگی رابردوو، لە شاری دێنهاخ و لە تەنیشت باڵەخانەی پەرلەمانی هۆڵەندا گەنجێکی 23 ساڵەی کۆچبەر هێرشی کرایەسەر و دواتر بەهۆی سەختیی برینەکانیەوە گیانی لەدەستدا.
ئەو چوار کەسەی گیراون، تەمەنیان لەنێوان 19 بۆ 23 ساڵدایە و بە فەرمانی دادگای هۆڵەندی، پۆلیسی هۆڵەندا داوای لە پۆلیسی ئەڵمانی کردووە رادەستیان بکاتەوە.
گەنجە کوژراوەکە لە کەمپێکی پەنابەراندا دەژیا؛ خەڵکی سۆماڵە و سێ ساڵ بوو هاتبووە هۆڵەندا.