کۆچبەران لە ئەڵمانیا.. گوتار لە دژیان زیادی کردووە و هێرش بۆسەریان کەم بووەتەوە
رووداو دیجیتاڵ
لە ئەڵمانیا، سەرەڕای بەهێزبوونی راستئاژۆ پەڕگیرەکان و دژایەتیکردنی کۆچبەران، بەڵام ئامارەکان پیشانی دەدەن، بەراورد بە ساڵانی رابردوو کەمتر هێرش کراوەتە سەر کۆچبەران.
لە ئەڵمانیا و سەرتاسەری ئەورووپا و تەنانەت ئەمریکاش، گوتاری دژی کۆچبەران و ئەوانەی باکگراوندی کۆچبەرییان هەیە، بەهێزە و دەنگیان پێ کۆدەکرێتەوە.
سەرەڕای زیادبوونی گوتاری دژی کۆچبەران، پۆلیسی ئەڵمانی دەڵێت، ئەم ساڵ بەراورد بە پار کەمتر رووداوی هێرشکردنە سەر کۆچبەران تۆمار کراون. لە نیوەی یەکەمی ئەم ساڵدا 519 کەیسی هێرشکردنە سەر کۆچبەران هەبووە، ساڵی 2023 لە هەمان ماوەدا 1155 کەیس تۆمار کراون؛ بە درێژایی پاریش 2450 کەیس هەبوون.
شارەزایانی پۆلیس دەڵێن، زۆربەی کەیسەکانی هێرشکردن لەو ناوچانە تۆمار کراون کە بەمنزیکانە هەڵبژاردنی لۆکاڵییان تێدا دەکرێن؛ وەکو توورینگن یان باڤاریا، لە شوێنەکانی وەکو بەرلین و هامبورگ و برێمن رێژەی هێرشەکان لە خوارەوەیە.