رووداو دیجیتاڵ
لەدوای جێهێشتنی کۆشکی سپی وەکو سەرۆکی ئەمریکا و خانەنشینبوونی، مووچەی خانەنشینی مانگانەی 34 هەزار و 416 دۆلاردەبێت.
بڕیارە 19ی کانوونی دووەم، جۆ بایدن دوایین رۆژی وەکو سەرۆکی ئەمریکا لە کۆشکی سپی بەسەربەرێت و رۆژی 20ی ئەم مانگەش، دۆناڵد ترەمپ وەکو 47مین سەرۆکی ئەمریکا بە فەرمی سوێندی یاسایی بخوات و دەستبەکاربێت.
بایدنی تەمەن 82 ساڵ، لە چوار ساڵی رابردوودا تەنیا لە رێگەی مووچەی سەرۆکایەتییەکەی بەگشتی 1.6 ملیۆن دۆلاری وەرگرتووە.
بەگوێرەی دەستووری ئەمریکا، مووچەی ساڵانەی سەرۆکایەتیی ئەمریکا 400 هەزار دۆلارە. ئەمە بێجگە لەوەی 50 هەزار دۆلاری دیکەشی وەکو خەرجییەکانی سەرۆکایەتی بۆ دابینکراوە.
هەروەها ساڵانە 100 هەزار دۆلار بۆ خەرجیی گەشتەکانی سەرۆکایەتی دابینکراوە.
بەگوێرەی ئەو مووچەی ساڵانەیەی بۆ سەرۆکی ئەمریکا دیاریکراوە، مووچەی مانگانەی جۆ بایدن وەکو سەرۆک، 33 هەزار و 333 دۆلارە. مووچەی هەفتانەی حەوت هەزار و 692 دۆلارە کە رۆژانە دەکاتە هەزار و 95 دۆلار و بۆ هەر کاژێرێک بایدن 45 دۆلار و 66 سەنتی پێدەدرێت.
لەدوای بەجێهێشتنی کۆشکی سپی و کۆتایی هاتنی ماوەی سەرۆکایەتیی ئەمریکا، بایدن خانەنشین دەبێت. ساڵانە پارەی خانەنشینییەکەی 413 هەزار دۆلار دەبێت و مانگانە 34 هەزار و 416 دۆلار وەردەگرێت.
ئەو پارە خانەنشینییەی بایدن دوو جۆر خانەنشینییە، لە خانەنشینی سەرۆکایەتیی ئەمریکا بایدن ساڵانە 246 هەزار دۆلار وەردەگرێت کە مانگانە 20 هەزار و 533 دۆلارە.
مووچەی خانەنشینیی دووەمی، خانەنشینیی ئەنجوومەنی پیرانە کە بایدن 36 ساڵ ئەندامی ئەنجوومەنەکە بووە، لەوەش مووچەی خانەنشینییەکەی ساڵانە 166 هەزار و 374 دۆلارە و مانگانە 13 هەزار و 862 دۆلار وەردەگرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ