جیهان
ژمارەیەک پۆلیسی بەریتانی. وێنەکە پەیوەندی بە هەواڵەکەوە نییە و تەنیا بۆ روونکردنەوە دانراوە: AFP
رووداو دیجیتاڵ
رووداوێکی تەقەکردن لە لەندەنی پایتەختی بەریتانیا روویداو و بەهۆیەوە شەش کەس بریندار بوون، کە یەکێکیان کچێکی تەمەن حەوت ساڵانە و برینەکەی سەختە.
رۆژی یەکشەممە، 15ـی کانوونی دووەمی 2023، میدیای فەرمیی بەریتانیا رایگەیاند، کاژێر 13:31 بەکاتی لەندەن [16:31 هەولێر] پۆلیس لە رووداوێکی تەقەکردن ئاگادارکراونەتەوە کە لەکاتی بەڕێوەچوونی رێوڕەسمی بەخاکسپاردنێک لە نزیک کەنیسەیەکی کاسۆلیکی رۆمانی روویداوە.
پۆلیسی لەندەن گوتی، بەهۆی رووداوەکە شەش کەس بریندار بوون، چوار ژن و منداڵی کچ کە یەکێکیان تەمەنی حەوت ساڵانە و ئەوەی دیکەشیان 12 ساڵە، برینی کچە حەوت ساڵانەکە و یەکێک لە ژنەکان سەختە.
هاوکات، کچە حەوت ساڵانەکە، بەگوێرەی پۆلیسی بەریتانیا گوێزراوەتەوە بۆ نەخۆشخانەیەکی ناوەندی لەندەن و "بە بارودۆخێکی سەختدا تێپەڕدەبێت" و لەژێر چاودێریی چڕی پزیشکیدایە.
لە راگەیێندراوێکدا پۆلیسی لەندەن گوتی کە پەڕاوێکی لێکۆڵینەوەیان بۆ رووداوەکە کردووەتەوە و گوتی، هێشتا بەدوای وردەکارییەکانی رووداوەکەدا دەگەڕێن، بەڵام "تاوەکو ئێستا هیچ کەسێک دەستگیر نەکراوە".
ئێد وێڵز، بەڕێوبەری پۆلیسی لەندەن گوتی: "هیچ رووداوێکی تەقەکردن قبووڵکراو نییە، بەڵام برینداربوونی چەند کەسێک، لەنێویدا دوو منداڵ لە کاتی نیوەڕۆی رۆژی شەممەدا تاساندمی. لێکۆڵینەوە لەم هێرشە قێزەونە دەستیپێکردووە بە بەشداریی پۆلیسی خۆجێیی و لێکۆڵەرە تایبەتمەندەکان".
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ