رووداو دیجیتاڵ
چەند ویلایەتێكی ئەمریکا، هەردوو کۆمپانیای گووگڵ و مێتا بە تێوەگلان لە گرێبەستێكی "نایاسایی" بۆ سەپاندنی هەژموونیان لە بازاڕی رێکلامکردن تۆمەتبار دەکەن.
رۆژی هەینی 14-01-2022، ژمارەیەک لە ویلایەتەکانی ئەمریکا سکاڵایەکیان لە دادگەی باڵای نیویۆرک بەرزکردەوە، تێیدا هەردوو کۆمپانیای گووگڵ و مێتا، بە تێوەگلان لە گرێبەستێکی هاوبەشی نایاسایی تۆمەتبار دەکەن کە هەردوو کۆمپانیا لە ساڵی 2018دا بەمەبەستی سەپاندنی هەژموونی خۆیان لە بازاڕی رێکلامکردن، واژۆیان کردووە.
بەگوێرەی ئەو سکاڵایە کە بەرزکراوەتەوە، کۆمپانیای گووگڵ هەوڵیداوە لە رێگەی دروستکردنی هاوپەیمانیەتییەک لەگەڵ فەیسبووک کۆنترۆڵی پشکی زۆری بازاڕی رێکلامکردنی جیهانی بکەن.
کۆنترۆڵکردنی ئەو بازاڕە لە رێگەی سیستەمێكی پێشکەوتووەوە ئەنجام دەدرێت کە تێیدا گووگڵ و فەیسبووک پشت بەو زانیارییە تایبەتانە دەبەستن کە بەکارهێنەر بەدوایاندا دەگەڕێت، دەنووسێت و قسەیان لەبارەوە دەکات، گووگڵ و فەیسبووک هەڵدەستن بە دانانی ئەو رێکلامانەی کە جێگەی گرنگی بەکارهێنەرن، ئەوەش لەسەر بنەمای مێژووی بەکارهێنەر لەسەر ماڵپەڕ و تۆڕەکۆمەڵایەتییەکان.
لە بەڵگەکانی سکاڵاکاندا ناوی هەریەک لە سوندار پیچای، بەڕێوەبەری جێبەجێکاری گووگڵ و فیلیپ شیندلەر، بەڕێوەبەری بەشی فرۆشتن، هەروەها لە کۆمپانیای فەیسبووکیش ناوی شیرڵ ساندبێرگ، بەڕێوەبەری فرۆشتن، هاتوون.
لە بەڵگەیەکی دیکەدا هاتووە، شیرڵ ساندبێرگ، لە نامەیەکدا کە بۆ مارک زوکەربێرگ، خاوەنی کۆمپانیای مێتای ناردووە تێیدا هاوپەیمانیەتییەکەی فەیسبووک لەگەڵ گووگڵ بە "زۆر گرنگ لەڕووی ستراتیژییەوە" ناودەبات.
لە سکاڵاکەدا هاتووە، هۆکاری پێکهێنانی هاوپەیمانیەتییەکە بۆ ترسی گووگڵ دەگەڕێتەوە لەوەی کە بازاڕی رێکلامکردنەکە جۆرێکی لێبێت لە دەستی دەربچێت و وای لێبێت ئەوانەی لە ماڵپەڕەکان رێکلام دەکەن باج بە گووگڵ نەدەن.
بەگوێرەی زانیارییەکانی کۆمپانیای "ئی مارکتەر"، لە ساڵی 2021، کۆمپانیای گووگڵ لە 28.6٪ی بازاڕی رێکلامکردنی جیهانی لەدەستداوە، کۆمپانیای فەیسبووکیش لەهەمان ساڵدا لە 23.7٪ی بازاڕەکەی بەدەستەوە بووە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ