ئاگرکوژێنەوانی نێودەوڵەتی: شێرپەنجە بووەتە هۆکاری گیانلەدەستدانی 66%ی کارمەندانی ئاگرکوژێنەوە

 

 

سام دیلن، کارمەندی ئاگرکوژێنەوەی شاری بۆستن دەڵێت، "بە تێکڕا هەموو سێ هەفتە جارێک، کارمەندێکی ئاگرکوژێنەوەی بۆستن تووشی جۆرێک لە جۆرەکانی شێرپەنجە دەبێت."

 

تیمەکانی ئاگرکوژێنەوە و کارمەندانی بەرگریی شارستانی لە سەرانسەری ئەمریکا نیگەرانن لەوەی ئەو مادانەی لە جلوبەرگە تایبەتییەکەیان بەکاردێن مادەی ژەهراوییان تێدابێت و رەنگە هۆکارێک بێت بۆ تووشبوون بە شێرپەنجە.

 

لەنێو ئەو مادانەدا، PFAS هەیە، کە کۆمەڵێک ماددەی تێکەڵاوی کیمیایین و بەرگەی ئاگر، چەوری، پەڵە و گریس و ئاو دەگرێت. مادەکە لە دروستکردنی جلوبەرگی کارمەندانی ئاگرکو‌ژێنەوە بەکاردەهێندرێت.

 

دانیاڵ راناهان، کارمەندی ئاگرکوژێنەوەی تووشبووی شێرپەنجە دەڵێت، "ئازاربەخشە. ئەم کوڕ و کچانە، هەموو رۆژێک ژیانیان دەخەنە مەترسییەوە، ئەم مادانە لە جلوبەرگە تایبەتەکەیاندا بەکاردەهێندرێت و دەشزانن ئەوەی دەیپۆشن، لە داهاتوودا زیانیان پێدەگەیێنێت، بەڕاستی ئەوان شیاوی باشترن."

 

بەگوێرەی کۆمەڵەی ئاگرکوژێنەوانی نێودەوڵەتی، لە ساڵانی 2019 بۆ 2022 شێرپەنجە 66%ی هۆکاری گیانلەدەستدانی کارمەندانی ئاگرکوژێنەوە بووە.

 

ئەلیزابێت هاریمان، مامۆستای زانکۆی لۆوێڵی ئەمریکا تایبەت بە کەمکردنەوەی بەکارهێنانی مادەی ژەهراوی دەڵێت، "دەرکەوتووە ئەو مادانە مەترسیدارن و کاریگەریی لەسەر تەندروستی دەبێت، وەکو سییەکان و رژێنی دەرەقی و هەندێکیشیان دەرکەوتووە تووشی شێرپەنجەت دەکات، ئەوانە کۆکراوەی چەند ماددەیەکی ژەهراوین، ئەمەش بەو واتایەی رەنگە مەترسیش بۆ کۆرپەلە دروست بکات و زۆر کاریگەریی تەندروستی دیکەشی هەیە."

 

رۆژی 31ی ئابی ئەمساڵ، لەدوای فراوانبوونی ناڕەزایەتییەکانی کارمەندانی بەرگریی شارستانی، پێنتاگۆن رایگەیاند، تاوەکو کۆتایی ساڵ بەکارهێنان و کڕینی ئەو مادانەی PFASیان تێدایە رادەگرێت.