رووداو دیجیتاڵ
سەرۆکی ئەنجوومەنی نوێنەرانی ئەمریکا رایگەیاند، کۆنگرێس لێکۆڵینەوەیەکی ورد و تەواو لە رووداوی تەقەکردن لە دۆناڵد ترەمپ، بەربژێری سەرەکی کۆمارییەکان بۆ هەڵبژاردنی سەرۆکایەتی دەکات.
مایک جۆنسن، سەرۆکی ئەنجوومەنی نوێنەرانی ئەمریکا کە یەکێکە لە سیاسەتڤانە نزیکەکانی ترەمپ لەنێو کۆمارییەکان، لەدوای تەقەکردن و بریندارکردنی دۆناڵد ترەمپ رایگەیاند، گەلی ئەمریکا شیاوی ئەوەن راستییەکان دەربارەی ئەو هێرشە بزانن.
جۆنسن لە ئێکسێکدا، نووسیویەتی، "ئێمە لە کۆنگرێس، لێکۆڵینەوەیەکی ورد و تەواو دەکەین."
سەرۆکی ئەنجوومەنی نوێنەرانی ئەمریکا ئاماژەی بەوەش کردووە، لە لێکۆڵینەوەکانیان، بانگهێشتی بەڕێوەبەری هێزی تایبەتی پاراستن کیمبرلی چیتڵ دەکەن. هەروەها بەرپرسانی ئاسایشی ناوخۆی ئەمریکا و مەکتەبی لێکۆڵینەوەی فیدراڵی (ئێف بی ئای)، تاوەکو بێنە کۆنگرێس و لەلایەن لیژنەکانەوە قسەیان لەگەڵ بکرێت.
جەیمس کۆمەر، ئەندامی ئەنجوومەنی نوێنەرانی ئەمریکا، کە سەر بە کۆمارییەکانە، ئاشکرای کرد، داوای لە بەڕێوەبەری هێزی ئاسایشی پاراستن کردووە رۆژی دووشەممە بچێتە کۆنگرێس و پرسیار دەربارەی رێکارەکانی هێزەکەیان لەکاتی هێرشەکەدا بۆ سەر سەرۆکی پێشووی ئەمریکا بکرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ