رووداو دیجیتاڵ
لە شارۆچکەی ئامکیی هەرێمی کێبێکی کەنەدا، پیکابێک خۆی بەنێو خەڵکی پیادەی سەر شۆستەیەکدا کرد، لە ئەنجامدا دوو کەس گیانیان لەدەستدا و نۆی دیکەش برینداربوون. پۆلیس دەڵێت رووداوەکە "تیرۆرستی" نییە.
هێلێن سانپیێر، گوتەبێژی پۆلیسی کێبێک رایگەیاند، شوفێرەکە خۆی رادەستکردووە. هەروەها گوتی "دوو لە بریندارەکان برینەکانیان سەختن".
هێلێن سانپیێر دەڵێ: شوفێرەکە تەمەنی 38 ساڵە و خەڵکی شارۆچکەکەیە. دوای خۆڕادەستکردنی، لە لایەن پۆلیسەوە بە تۆمەتی خۆلێدان لە خەڵک بە ئۆتۆمبێل و راکردن، دەستبەسەرکراوە.
بەرپرسێکی باڵای حکومیی ئاگادار لە بابەتەکە ئاماژەی بەوە کردووە، رووداوەکە "تیرۆرستی"، یان پەیوەندیی بە ئاساییشی نیشتمانییەوە نەبووە.
رووداوەکە رۆژی دووشەممە کاژێر 03:00ـی دوای نیوەڕۆ بەکاتی کەنەدا (کاژێر 10:00ـی شەو بەکاتی هەولێر) روویداوە.
دەستەی تەندروستیی کێبێک رایگەیاند، لە نەخۆشخانەی گشتیی ئامکی ئاستی ئامادەباشیی "پرتەقاڵی" راگەیێندراوە، کە تایبەتە بەو کاتانەی ژمارەیەکی زۆری بریندار هەن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ