تایلاند ژمارەیەکی پێوانەیی لە سەردانیکردنی گەشتیاران تۆمار دەکات

 

تایلەندییەکان بە سەما پێشوازیی لە گەشتیاران دەکەن، سەرۆکوەزیرانیش خۆی سەیریان دەکات. 

 

لە فڕۆکەخانەی نێودەوڵەتی بانکۆک رۆژێکی تایبەتە، بە بۆنەی تێپەڕاندنی 10 ملیۆن گەشتیارەوە هەمووان خۆشحاڵن، سەرۆکوەزیران قسەی بۆ گەشتیاران کرد و هەندێکیانی خەڵاتکردن.

 

پرایوث چان ئۆچا، سەرۆکوەزیرانی تایلاند گوتی "رێوشوێن و پلانی تووندمان هەیە کە لەلایەن کۆمەڵگەی نێودەوڵەتییەوە قبووڵکراون و رێگەمان پێدەدات پێشوازی لە هاتنی هەموو کەسێک بکەین. ئەمڕۆ، ئەو چانسەمان هەیە هاتنی زیاتر لە 10 ملیۆن گەشتیار رابگەیێنین."

 

لە ساڵی 2019ـدا 40 ملیۆن گەشتیار سەردانی تایلاندیان کردووە، لەو ساڵەدا داهاتی گەشتیاری 59 ملیار و 800 ملیۆن دۆلار بووە و 11٪ـی ئابووریی وڵاتەکەی پێکهێناوە، بەڵام لە ساڵی 2021ـدا بەهۆی کۆرۆماوە، ئەو ژمارەیە بۆ تەنیا 473 هەزار گەشتیار دابەزی، بەوەش داهاتەکەی بۆ 5 ملیار دۆلار کەمبووەوە و 1٪ـی ئابووریی وڵاتەکەی پێکهێنا، بەڵام 10 ملیۆن گەشتیارەکەی ئەمساڵ نزیکەی 14 ملیار دۆلار داهاتیان بۆ وڵاتەکە هێناوە و ئێستا 14٪ـی ئابووریی وڵاتەکە پێکدەهێنێت.

 

بەرپرسانی تایلاند دەیانەوێت نیشانی بدەن وڵاتەکە هێشتا شوێنێکی گرنگی گەشتیارییە.

 

ئ یگناتیک لیا، گەشتیارێکە و دەڵێت "تایلاند وڵاتێکی زۆر جوانە، گەلێکی زۆر جوانە، تەواوی خەڵکەکە هاوکاریم دەکەن." ئۆنور ئاکتورک، ئەویش گەشتیارە و دەڵێت "بڕیارم دا بێمە تایلاند چونکە وێنەی جوانم لە تۆڕە کۆمەڵایەتییەکان بینی و ویستم دوورگە جوانەکانی وەکو فیفی ببینم. هەروەها حەزم لە خواردنەکانە و بیستوومە ئێرە بازاڕێکی شەوانەی زۆر خۆشی هەیە، بۆیە بڕیارم دا بێمە ئێرە."

 

حکومەتی تایلاند پێشبینی دەکات لەمساڵدا 11 ملیۆن و لە ساڵی داهاتووشدا 13 ملیۆن گەشتیار سەردانی وڵاتەکە بکەن، سووککردنی رێوشوێنەکانی کۆرۆنا لە چین و ژاپۆن یەکێک لە هۆکارەکانی بووژانەوەی کەرتی گەشتیاریی تایلاندە.