رووداو دیجیتاڵ
وەزارەتی کشتوکاڵی تورکیا دەڵێت، لە 21ـی ئەم مانگەوە تاوەکو لانیکەم 15ـی ئۆکتۆبەر، هەناردەکردنی گەنم بۆ ئەورووپا رادەگرێت، ئەوەش نیگەرانی ئەورووپای لێکەوتووەتەوە و چاوەڕێ دەکرێت نرخی گەنم بەرز بکاتەوە.
وەزارەتی کشتوکاڵی تورکیا لە راگەیێندراوێکدا ئاماژەی بەوە کردووە، بڕیاریانداوە بۆ پاراستنی بەرهەمهێنەرانی گەنم لەنێوخۆی تورکیا ئەو رێکارە بگرنە بەر؛ ئەوەشی راگەیاندووە، رێوشوێنی دیکەی زیاتر بۆ پاڵپشتیکردنی بەرهەمهێنەرانی گەنم دەگرنە بەر.
لە راگەیێندراوەکەی وەزارەتی کشتوکاڵی تورکیادا هاتووە: "رێوشوێنەکان بۆ رێگریکردن لە دابەزینی نرخ و دڵنیابوون لە سەقامگیری بازاڕ دەگیرێنە بەر".
هەرچەندە وەزارەتی کشتوکاڵی تورکیا راگرتنی گەنمی بۆ ئەورووپا تاوەکو 15ـی ئۆکتۆبەر راگەیاندووە، بەڵام ئاماژەی بەوەش کردووە، دەکرێت بەگوێرەی دۆخی بازاڕ ماوەکەی درێژ بکەنەوە.
بڕیارەکەی تورکیا ترسی لەدەستدانی خواستی ئەورووپای بۆ گەنم لێکەوتەوە، کاریگەری لەسەر بۆرسەی جیهانی دروست کرد و لە بۆرسەی یۆرۆنێکست نرخی گەنم بە رێژەی 3٪ـی دابەزی.
تورکیا پێنجەم گەورەترین هەناردەکاری گەنمە لە جیهان. بەگوێرەی ئەنجوومەنی جیهانی دانەوێڵە، پێشبینی دەکرێت تورکیا لە ساڵی 2024 نزیکەی 12 ملیۆن تۆن دانەوێڵە هەناردەی دەرەوە بکات، لەو بڕەش 8.5 ملیۆن تۆن گەنم هاوردە دەکات.
بەهۆی نالەباریی کەشوهەوا، شەڕی ئۆکراینا و کەمبوونەوەی لە کۆگەکان، نرخی گەنم ئاستێکی پێوانەیی تۆمارکردووە.
ئێستا نرخی بوشڵێک گەنم (27 کیلۆگرام) لە بۆرسەی شیکاگۆ بۆ مادە خۆراکییەکان 7.7 دۆلار و 9 سەنتە.
وەزارەتی کشتوکاڵی ئەمریکا پێشبینی دەکات لە وەرزی داهاتوودا گەنمی کۆگاکراو لە جیهاندا بۆ نزمترین ئاستی کەم ببێتەوە.
لە 22ی ئایاری ساڵی 2022دا و بەهۆی شەڕی ئۆکرایناوە، نرخی تۆنێک گەنم گەیشتە 405 دۆلار. ئەوە بەرزترین ئاستی نرخەکەی بوو لە مێژوودا.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ