سەرۆکی ئەنجوومەنی پیرانی ئیتاڵیا بۆ نێچیرڤان بارزانی: سوپاس کە لەجیاتی جیهان لە ریزی پێشەوەی شەڕی دژی تیرۆر بوون

 

فرانسیس یەکەمین پاپایە لە مێژوودا سەردانی عێراق و هەرێمی کوردستانی کردبێت. ئامانج لە سەردانە مێژووییەکەی پاپا لە 5 تا 8ی ئاداری 2021 بۆ بەغدا، موسڵ و هەولێر برەودان بە "گفتوگۆی نێوان ئایینەکان" و پێشاندانی هاوسۆزی بوو بۆ کرستیانەکانی ناوچەکە، ئەمە وەک ڤاتیکان باسی کردبوو. 

 

 

دڵشاد شەهاب، گوتەبێژی سەرۆکایەتیی هەرێمی کوردستان لە ڤاتیکان بە زنار شینۆ، نێردراوی رووداوی گوت: "پێگەی هەرێـمی کوردستان بۆ ڤاتیکان گرنگە، چونکە شوێنێکی بەرچاوی پێکەوەژیانە بۆ ڤاتیکان."

 

دوای ئەم دیدارەی، سەرۆکی هەرێمی کوردستان دەچێتە رۆما و لەگەڵ سەرۆکی پەرلەمان، وەزیری دەرەوە و سەرۆکوەزیرانی ئیتاڵیا کۆدەبێتەوە، ئەمە وەک دڵشاد شەهاب باسی کرد. 

 

ئەم سەردانەی سەرۆکی هەرێمی کوردستان لەسەر بانگهێشتی جۆرجیا میلۆنی، سەرۆکوەزیرانی ئیتاڵییە کە کانوونی یەکەمی ساڵی رابردوو سەردانی عێراق و هەرێمی کوردستانی کرد. لە پاڵ بەسەرکردنەوەی 900 سەربازەکەی وڵاتەکەی، لەگەڵ بەرپرسانی باڵای بەغدا و هەولێریش پەیوەندییەکانیان تاوتوێکردن و لایەنەکانی بەرەو چارەسەرکردنی کێشە ناوخۆییەکانیان هاندان. 

 

دڵشاد شەهاب گوتی، "دۆستە بیانییەکانمان هانمان دەدەن تەبایی و یەکڕیزیمان بپارێزین،" ئاماژەی بەوەشکرد،  "ئیتاڵیا دەیەوێت سەقامگیری لە رۆژهەڵاتی نێوەڕاست بەرقەراربێت."

 

 

پەیوەندیی سەربازی و بازرگانی ئیتاڵیا بە هەرێمی کوردستان و عێراق دەبەستنەوە.

 

ئیتاڵیا لە ساڵی 2015ـەوە ئەندامی هاوپەیمانیی نێودەوڵەتیی دژی داعشە 900 سەربازی لە هەرێمی کوردستان و عێراق جێگیرکردووە. هاوکات مەشق و راهێنانی بە 58 هەزار پێشمەرگە و ئەندامی هێزە ئەمنییەکانی عێراق کردووە.

 

جگە لەوە، ئیتاڵیا تاوەکو ئێستا 430 ملیۆن دۆلاری وەکو یارمەتیی دارایی و قەرز داوەتە عێراق.

 

لە رووی بازرگانیشەوە، بە گوێرەی ئامارە فەرمییەکانی حکومەتی ئیتاڵیا، ساڵی رابردوو هەناردەی ئیتاڵیا بۆ عێراق و هەرێمی کوردستان سەرووی 765 ملیۆن یۆرۆ بووە کە بەشی هەرە زۆری ئامێر و تەکنەلۆجی جیاجیا بووە. 

 

هەناردەی عێراق و هەرێمی کوردستانیش بۆ ئیتاڵیا سەرووی 5 ملیار و 71 ملیۆن یۆرۆ بووە، کە 99٪ی نەوت بووە کە بە گوێرەی میدیای ئیتاڵیا، 16 کۆمپانیای ئەو وڵاتە لە عێراق و هەرێمی کوردستان کاردەکەن.

 

جگە لە پاپای ڤاتیکان، سەرۆکی هەرێمی کوردستان لەگەڵ كاريناڵ پيترۆ پارۆلين، سەرۆکوەزیرانی ڤاتیکان کۆبووەوە. سەرۆکوەزیرانی ڤاتیکان پێکەوەژیانی لە هەرێمی کوردستان بە "دڵخۆشکەر" لە قەڵەم داوە.