بایدن سەردانی شاری باوباپیرانی لە ئێرلەندا دەکات: ئێرە خۆشە و نازانم بۆچی باوباپیرانم جێیانهێشت

 

 

جۆ بایدن، سەرۆکی ئەمریکا کە بەناوبانگترین رۆڵەی ئەو شارەی ئێرلەندایە گوتی، "نازانم بۆچی باوباپیرانم ئێرەیان جێهێشت. ئێرە خۆشە."

 

بایدن بەنێو خواردنگە و فرۆشگەکانی شەقامێکی شاری دەنداڵکدا رۆیشت و سڵاو و تەوقەی لەگەڵ خەڵکەکەی کرد و وێنەی لەگەڵدا گرتن.

 

خەڵکی شارەکە بە تامەزرۆییەوە باسیان لە کولتووری ئێرلەندی بۆ بایدن کرد.

 

بایدنی تەمەن 80 ساڵ لە ویلایەتی پەنسلڤانیای ئەمریکا لەدایکبووە، بەڵام دایک و باوکی بە رەچەڵەک ئێرلەندی بوون. باپیرە گەورەی بایدن لە نێوەڕاستی سەدەی نۆزدەیەم ئێرلەندای بەرەو ئەمریکا بەجێهێشتبوو.

 

دوای ئەوەی رۆژی سێشەممە 11-04-2023 سەردانێکی کورتی بۆ باکووری ئێرلەندا کرد، رۆژی چوارشەممە 12-04-2023 سەرۆکی ئەمریکا گەیشتە کۆماری ئێرلەندا. بڕیارە بۆ ماوەی سێ رۆژ لەوێ بمێنێتەوە.

 

بڕیارە بایدن لە پەرلەمانی کۆماری ئێرلەندا لە دوبلن گوتارێک پێشکێش بکات، هەروەها بۆ ئێوارەخوانێک سەردانی ناوچەی کاونتی مایۆ دەکات کە شوێنێکی دیکەی باوباپیرانیەتی لە رۆژئاوای وڵاتەکە.