رووداو - بولگاریا
كاژێر سێی دوانیوەڕۆیە، فرمێسك بە چاوانی كاكۆ-دا دێتە خوار، پاشا و نەوید و زەبیحوڵڵای هاوڕێی لەدەوری دێن و دەچن و دڵنەوایی دەدەنەوە و دەڵێن چارەنووسی گشتمان مردنە، خودا لێی خۆش بێ و جێگای بەهەشتە، وەلێ ئەم قسانە زۆر دڵنەوایی كاكۆ ناكەن كە لە كابولی پایتەختی ئەفغانستانەوە هەواڵی كۆچی دوایی باوكی پێگەیشتووە، ئەو بەكوڵتر دەگری و چەند بیرەوەرییەكی خۆی و باوكی دەگێڕێتەوە، تكا و پاڕانەوەی باوكی هەرگیز لەیاد ناچن، كاتێك پێیگوتووە: "تكات لێدەكەم ئەفغانستان جێمەهێڵە و ڕێگەی ئەوروپا مەگرەبەر". بەڵام ئەم قسانە كاكۆ لە بڕیارەكەی پەشیمان ناكەنەوە.
كۆچبەرە ئەفغانەكان، بەرنامەیان دانا شەو پرسە بۆ مردنی باوكی كاكۆ دانێن، كوردەكانیش بەشدارییان لە پرسەكەدا كرد.
هەڵۆ، كۆچبەرێكی كوردی خەڵكی هەولێرە، لەلایەن پۆلیسی بولگاری لەسەر سنوور دەستگیركراوە و راپێچی گرتووخانەی لۆبۆمێز كراوە. ئەو باسی ئەو پەیوەندییە گەرموگوڕە دەكات كە لە نێوان كورد و فارس و ئەفغانەكانی نێو گرتووخانەی لۆبۆمێزدا هەیە.
ژووری كوردەكان لەتەك ژووری ئەفغانییەكانە و بەشێك لە ئەفغانییەكان لە ژووری كورد دەمێننەوە و پەیوەندی و تێكەڵاویی باش لەنێوان هەردوولا هەیە، لەكاتی مردنی باوكی كاكۆ، پێكەوە پرسەیان دانا.
نانی ئێوارە خورا، دونیا تاریك بوو، كورد و ئەفغانییەكان، قەرەوێڵە دوو تابقیەكانیان خستە پاڵ یەكدی بۆئەوەی شوێنی دانیشتن هەندێ فراوان بكەن. نەوید كە گەنجێكی ئەفغانییە دەستیكرد بە قورئان خوێندن، دەستە دەستە هاوڕێ ئەفغانییەكانی كاكۆ دەهاتنە پرسەكە و فاتیحایان دەخوێند. كوردەكانیش لەو ساتەدا كۆلایان بە گڵاسی سەفەری بەسەر بەشداربووانی پرسەدا دابەش دەكرد. لەدوای نەوید، سەباح چەند ئایەتێكی خوێند، دەستەیەكیش بۆ پێشوازی لە میوانانی پرسە و سوپاسگوزاری و بەڕێكردنی میوانان دانرابوون.
هەڵۆ گوتی: "ئەم تێكەڵاوییەی نێوان كورد و ئەفغانییەكان و بەڕێوەبردنی پرسە بەلای نەتەوەكانی دیكەوە جێی سەرنج بوو".
لۆبۆمێز، گرتووخانەیەكە لە باشووری رۆژهەڵاتی بولگاریا كە كۆچبەری میللەتانی ناوچەكەی لەخۆگرتووە لە كورد، ئێرانی، عێراقی، سووری، ئەفغانی، پاكستانی، بەنگلادیشی، میسری، نەیجیری، جەزائیری، سریلانكی، تونسی و مەغریبی، هەر ژوورە و تایبەتە بە میللەتێك، یا دوو میللەت كە زمانیان هاوبەشە، یان ئاین و رەنگ كۆیاندەكاتەوە.
سەفین، دوو مانگ بوو هاتبووە گرتووخانەی لۆبۆمێز، لەمەڕ پەیوەندی كورد و میللەتانی دیكە بە (رووداو)ی گوت: "كورد، بەهۆی نزیكیی جوگرافی و نزیكیی زمانەوە لەگەڵ فارسەكانیش تێكەڵاویی باشی هەیە و بە فارسی لەگەڵ فارسەكان دەدوێین، بەهۆی زۆر قسەكردنمان لەگەڵ یەكدی، دەمانخواست بەهاوبەشی بۆنەكانی وەكو جەژن بكەین، چونكە ئەگەر لە دەرەوەی زیندان بووینایە بەدڵنیاییەوە جەژنانەمان دەكرد، لەبەرئەوە دەشێ لە گرتووخانەیش ئەو رۆژە جیاواز لەچاو رۆژانی دیكە بەسەر بەرین".
سەفین، كە خەڵكی بۆكانە و لە سنووری بولگاریا و رۆمانیا دەستگیر كراوە، گوتیشی: "یەكەم رۆژی جەژنی قوربان، زوو لە خەو هەڵساین و جلی جوانمان پۆشی، لەدوای كاژێر هەشتی بەیانییەوە، كوردەكان و فارسەكان بەیەكەوە ئەم ژوور و ئەو ژوور دەگەڕاین كە موسوڵمان بوون، بەرەو ژووری كوردەكان، فارسەكان، ئەفغانییەكان، بەنگلادیشییەكان، پاكستانییەكان و عەرەبەكان دەچووین و پیرۆزباییمان لەیەكدی دەكرد و بە پێكەنینەوە ئەملاولای یەكترمان ماچ دەكرد، ئەم ڕۆژە، لە چاو ڕۆژانی دیكە خۆشتر و پڕ نەشئەتر بوو، هەموومان دڵخۆش و شادومان بووین".
سەفین، لەدوای ئازادبوونی بەرنامەی دانابوو خۆی بگەیەنێتە بەریتانیا، بە سەرسوڕمانەوە گوتی: "لام سەیرە، كوردەكانی باشوور و رۆژهەڵات، زۆر بەكەمی پەیوەندییان لەگەڵ عێراقی و عەرەبزمانەكان هەیە، تەنانەت بەكەمی سڵاو لە عەرەب دەكەن، نازانم ئەمە پەیوەندی بە چییەوە هەیە و بۆ هێندە لێكدوورن"..
سالار، گەنجێكی بیست و یەك ساڵە و خەڵكی پێنجوێنە و پەیوەندی باشی لەگەڵ ئەفغانی و فارسەكان هەیە و لەنێو گیراوەكان بە پیاوی گۆرانی ناسراوە، چونكە هەمیشە گوێ لە گۆرانی دەگرێ، گۆرانیی زۆری لەنێو مۆبایلێكی بچووك ئەرشیف كردووە، ئەو بە (رووداو)ی گوت "لەنێو ئەو هەموو میللەتە جیاوازانەی ئێرە، ئێمەی كورد، پەیوەندی زۆر باشمان لەگەڵ فارس و ئەفغانی هەیە، من بە شڕە فارسییەكەوە تێیاندەگەیێنم و لێیان حاڵی دەبم، بۆیە زۆربەی كاتەكان بەیەكەوە بەسەردەبەین و بەشێك لە كوردەكان تا درەنگانێكی شەو، خەریكی یاریكردنن، دۆمینە، دامە، پیشەی سەرەكیمانە، نۆرە دەگرین تا یاریزانێك دەدۆڕێ و جێگەكەی چۆڵ دەكا، ئینجا یەكی دیكە دەچێتە شوێنی، زۆربەی كاتەكان بەخۆشی بەڕێوەدەچن، پێكەنین و دڵخۆشی بەسەر ئامادەبووان زاڵ دەبێ، بڕێ جاریش، دەبێتە قڕەقڕ و تا لێواری كێشان بەدەمی یەكدیدا دەڕوا، ئینجا هەریەكە بەلایەكدا دەڕوا و ژوورەكە جێدێڵن".
سالار، لەبارەی پەیوەندی لەگەڵ فارسەكان گوتیشی: "لەسەر مێزی نانخواردن بەیەكەوە دادەنیشین و نان دەخۆین، رۆژانەش لە مەمەڕەكان پیاسە دەكەین و قسە و باسی جیاواز دەكەین. لەدوای نانخواردنی ئێوارە، بەشێك لە كوردەكان دەچنە ژووری فارسەكان، یا بە پێچەوانەوە، لەوێ خەریكی تاوڵە و كۆنكان دەبین".
كورد و ئەفغانییەكان هێندە تێكەڵن، لەكاتی ئازادبوونی یەكێك لە كوردەكان یا ئەفغانییەكان، بۆ یەكدی دەگرین و تا ماوەیەك باوەش لەیەكدی دەدەن و بە چاوی فرمێسكەوە خوداحافیزی لەیەكدی دەكەن و هیوای هاتنەدی خۆزگەكان بۆ یەكدی دەخوازن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ