سوێد: هاوکاری ئەو سوێدیانە ناکەین کە لە کامپەکانی سووریان و دەیانەوێت بگەڕێنەوە

 

 

تۆبیاس بیلسترۆم، وەزیری دەرەوەی سوێد، ئەمڕۆ چوارشەممە، ئەو لێدوانەی دا.

 

ئەو گوتی، "حکومەت هیچ کارێک ناکات بۆ ئەوەی ئەو هاووڵاتییە سوێدیانە یان ئەو کەسانەی پەیوەندیان بە سوێدەوە هەیە و لەو کامپانەن لە باکووری رۆژهەڵاتی سووریا، بگەڕێندرێنەوە بۆ سوێد". 

 

وەزیری دەرەوەی سوێد هەروەها گوتی، "سوێد هیچ بەرپرسیارێتییەکی یاسایی نییە بەرامبەر بەو کەسانە تاوەکو بیانگەڕێنێتەوە بۆ وڵاتەکە، ئەم بڕیارەش سەرجەم پیاو و ئافرەت و منداڵەکانیش دەگرێتەوە". 

 

لە ساڵی 2019وە و لەگەڵ رووخانی خەلافەتەکەی داعش، زۆربەی کەسوکار و منداڵانی چەکدارانی داعش لە کامپەکان دەستبەسەر کران.

 

بەگوێرەی ئامارەکانی نەتەوە یەکگرتووەکان، 43 هەزار کەس لە کامپی هۆلن، کە هاووڵاتی 45 وڵاتن و زۆربەشیان خەڵکی سووریا و عێراقن. 

 

وەزیری دەرەوەی سوێد رایگەیاند، لە چەند ساڵی رابردوودا، هاووڵاتییە سوێدییەکانی نێو ئەو کامپانە، دەرفەتیان بۆ رەخسێندراوە بگەڕێنەوە بۆ سوێد، بەڵام "هەمووجار رەتیانکردووەتەوە بگەڕێنەوە". 

 

بەگوێرەی ئامارێکی میدیای سوێد، سێ ئافرەت و پێنج منداڵی سوێدی ئێستا لەو کامپانەن، بەڵام وەزیری دەرەوە رایگەیاند، "بەرپرسیارێتی ئەو منداڵانە لای باوانیانە نەک سوێد، چونکە ئەوان بڕیاریانداوە بچنە سووریا و پەیوەندی بە داعشەوە بکەن، کە یەکێکە لە دڕەندەترین رێکخراوە تیرۆرستییەکانی جیهان".

 

بەگوێرەی وەزارەتی دەرەوەی سوێد پێش تشرینی یەکەمی 2021، 30 هاووڵاتی سوێدی، کە 10 ئافرەت بوون و 20یان منداڵ لەو کامپانە دەستبەسەر بوون، بەڵام لە ماوەی دوو ساڵی رابردوودا، 22یان رەوانە کراونەتەوە، پێش ئەوەی حکومەتی سوێد هەڵوێستی خۆی بگۆڕێت.