چوار کۆچبەر لە نۆکەندی ئینگلیز گیانیان لەدەستدا

 

 

بەرپرسانی فەرەنسا دەڵێن، سەرلەبەیانی ئەمڕۆ هەینی 12ی تەممووز بەلەمێک بە دەیان کۆچبەرەوە لە نۆکەندی ئینگلیز نزیک لە شاری بولن سوغ مێغی فەرەنسا نوقم بووە، هەر زوو چەند تیمێک لە رێگەی هێلیکۆپتەرێک و کەشتی و بەلەمێکەوە چوون بۆ رزگارکردنی کۆچبەرەکان و 66 کۆچبەریان رزگار کردوون.

 

بەرپرسانی فەرەنسا دەڵێن، کۆچبەرە رزگارکراوەکان چارەسەریان بۆ کراوە و دواتر لە پەناگەیەکدا نیشتەجێکراون.

 

بەڵام پێش ئەوەی تیمی فریاگوزاری بگاتە شوێنی رووداوەکە، 4 کۆچبەر گیانیان لەدەستداوە.

 

چوونی کۆچبەران بۆ بەریتانیا بەردەوامە و تاوەکو ئێستا حکومەتی ئەو وڵاتە نەیتوانیوە چارەسەرێکی بنەڕەتی بۆ بدۆزێتەوە.

 

وەزارەتی ناوخۆی بەریتانیا کە مامەڵە لەگەڵ پرسی کۆچبەری دەکات، دەڵێت، تەنیا دوێنێ 62 کۆچبەر بە یەک بەلەم لە نۆکەندی ئینگلیز پەڕیونەتەوە.

 

وەزارەتی ناوخۆی بەریتانیا ئاماژە بەوە دەکات، لە سەرەتای ئەم ساڵەوە 14 هەزار و 120 کۆچبەر لە رێگەی بەلەمەوە گەیشتوونەتە نێو وڵاتەکەی.

 

یوڤێت کوپەر، وەزیری ناوخۆی بەریتانیا دەڵێت، هەنگاوێکی سەرەکی بۆ پەڕینەوەی کۆچبەرانی نایاسایی بریتییە لە پێکهێنانی هێزێکی ئاسایشی سنوور کە رووبەڕووی قاچاخچییەکان بێتەوە.

 

کوپەر دەڵێت، "باندە تاوانکارییەکان پارەیەکی زۆریان دەست دەکەوێت ئەوە لە کاتێکدایە ژیانی خەڵکی دیکە دەخەنە مەترسییەوە. کارەکانمان لەگەڵ هاوبەشە نێودەوڵەتییەکانمان بۆ دۆزینەوە و هەڵوەشاندنەوەی باندە قاچاخچییە مەترسیدارەکان خێرا کردووە."