زاراوەی "چیای ئارارات" کێشەی دیبلۆماسی لەنێوان چین و تورکیا دروستدەکات

 

 

حامی ئاکسۆی، گوتەبێژی وەزارەتی دەرەوەی تورکیا رایگەیاند، رۆژی 11ی نیسان لە رێگەی پەیوەندیکردن بە باڵیۆزی چین لە ئەنقەرە و وەزارەتی دەرەوەی چین لە پەکین لەسەر نووسینی زاراوەی "چیای ئارارات" لەسەر ئەو هاوکارییانەی بۆ ئەرمینیا رەوانەکراون، داوای روونکردنەوەیان کردووە.

 

حامی ئاکسۆی، گوتەبێژی وەزارەتری دەرەوەی تورکیا رایگەیاند "رۆژی 11ی نیسان لە رێگەی پەیوەندیکردن بە باڵیۆزی چین لە ئەنقەرە و وەزارەتی دەرەوەی چین داوای روونکردنەوەمان کردووە".

 

ئاکسۆی دەڵێ، باڵیۆزی چین لە ئەنقەرە پێی راگەیاندوون کە ئەو هاوکارییانەی بۆ ئەرمینیا رەوانەکراون، لەلایەن ئیدارەیەکی خۆجێیی چینەوە رەوانە کراون و لەلایەن کۆمپانیایەکی کەرتی تایبەتیشەوە گوازراونەتەوە بۆ یەریڤانی پایتەختی ئەو وڵاتە. لەسەر هاوکارییەکان بە رێنووسی چینی نووسراوە و باس لە چیای ئارارات نەکراوە، بەڵام بۆیان دەرکەوتووە کە رێنووسە ئینگلیزییەکە دواتر زیادکراوە.

 

گوتەبێژی وەزارەتی دەرەوەی تورکیا راشیگەیاندووە "باڵیۆزی چین لە ئەنقەرە پێی راگەیاندووین ئەو هاوکارییانە لەلایەن ئیدارەیەکی خۆجێیی چینەوە رەوانەکراون، لەسەر هاوکارییەکان بە رێنووسی چینی نووسراوە و دواتر رێنووسی ئینگلیزیی بۆ زیادکراوە".

 

باڵیۆزی چین لە ئەنقەرە بە وەزارەتی دەرەوەی تورکیای راگەیاندووە، دەستیان بە لێکۆڵینەوە کردووە و ئاماژەی بەوەش کردووە کە کۆماری چین رێز لە سەروەری و یاکپارچەیی خاکی تورکیا دەگرێت.

 

هاوکارییەکانی چین پێکهاتوون لە 120 ئامێری هەناسەدانی دەستکرد، دوو وێستگەی ئۆکسجین، 60 هەزار کیت، 60 هەزار ماسکی پزیشکی، 280 هەزار ماسکی ئاسایی، 20 هەزار چاویلکە، 100 هەزار جلوبەرگی تایبەت بە خۆپاراستن لە کۆرۆنا و بڕێک دەرمان.

 

چیای ئارارات یان چیای ئاگری، لە پارێزگای ئاگریی باکووری کوردستان هەڵکەوتووە. ئەم چیایە هاوسنوورە لەگەڵ شاری ماکۆ لە رۆژهەڵاتی کوردستان لە ئێران و وڵاتانی ئازەربایجان و ئەرمینیا؛ یەکێکە لە هێماکانی ئەرمینییەکان و شوێنی دامەزراندنی کۆماری ئاراراتە.