مافی مرۆڤی پەرلەمانی بەریتانیا لەبارەی ناردنی کۆچبەران بۆ رواندا: گونجاو نییە

 

 

ئەمڕۆ دووشەممە، لیژنەی مافی مرۆڤ کە چاودێری یاساکانی پەرلەمانی بەریتانی دەکات و هەڵسەنگاندن بۆ پرۆژەیاساکان دەکات، بە گوێرەی "دەستووری نەریتیی" نەنووسراوی ئەو وڵاتە و بنەماکانی مافی مرۆڤ، رایگەیاندووە، ئەو پلانەی حکومەتی بەریتانیا لەگەڵ بنەماکانی مافی مرۆڤ "ناگونجێت".

 

لیژنەکە دەڵێت، "ئێستا پرۆژەیاساکە لە دوای رەتکردنەوەی لەلایەن دادگەی باڵای بەریتانیاوە خراوەتە بەردەم ئەنجوومەنی لۆردان بۆ تاوتوێکردن و هەموارکردنەوەی پلانەکە".

 

پرۆژەیاساکە مانگی 12ـی 2023 بە دەنگی پارتی پارێزگارانی خاوەن زۆرینە لە پەرلەمان پەسندکرا، ئێستا رووبەڕووی دوو بەربەست بووەتەوە؛ پەرلەمانتارانی ئۆپۆزسیۆن لە نێویاندا پارتی کرێکاران لەلایەک و دادگەی باڵای بەریتانیاش لەلایەکی دیکە، کە دادگەکە لە بنچینەدا رەتیکردووەتەوە و رواندای بە وڵاتێكی نائارام بۆ کۆچبەران ناو بردووە.

 

ئەگەر پرۆژەیاساکە ببێتە یاسا و بچێتە بواری جێبەجێکردنەوە، هەر کۆچبەرێک بە رێگەی نۆکەندی ئینگلیزەوە بچێتە بەریتانیا دەستگیر دەکرێت و دەستبەجێ بە فڕۆکە رەوانەی رواندا دەکرێت.

 

لیژنەی مافی مرۆڤ کە هەردوو پارتی پارێزگار و کرێکاران لە خۆدەگرێت دەڵێت، پرۆژەیاساکە هیچ رێگەیەک بۆ کۆچبەران ناهێڵێتەوە پەنا بۆ دادگەیەکی سەربەخۆی بەریتانیا ببەن بۆ چەسپاندنی مافی مانەوەیان لەو وڵاتە.

 

هەروەها رەخنە لە بەڵێنەکانی حکومەتی رواندا دەگرێت و دەڵێت، "رواندا لە پێگەیەکدا نییە بتوانێت بەڵێنەکانی بە باشترکردنی بارودۆخی مافی مرۆڤ و مامەڵەکردن لەگەڵ کۆچبەران، بباتەسەر".

 

لیژنەکە داوا دەکات، لەم پرسەدا سیستمی دادگەی بەریتانیا بڕیار لەسەر شیاوی و نەشیاوی رواندا بدات، هۆشداریش دەدات لەوەی ئەگەر پرۆژەیاساکە بۆ جاری دووەم لە پەرلەمان پەسند بکرێت ئیدی دادگەش ناتوانێت رەتی بکاتەوە و دەبێت بچێتە بواری جێبەجێکردنەوە.

 

دژبەرانی پرۆژەیاساکە داوای هەموارکردنەوەی زیاتر لە 90 بڕگەیان کردووە و وەزارەتی ناوخۆی بەریتانیاش رایگەیاندووە، "سوورین لەسەر هەموارکردنەوەی ئەو بڕگانە و جێبەجێکردنی پلانەکە".