رووداو دیجیتاڵ
لە رووداوێکی تەقەکردندا لە دوو ناوچەی جیاوازی کانتۆنی ڤالیسی باشووری سویسرا دوو کەس کوژران و یەکێکی دیکەش بریندار بوو.
رۆژی دووشەممە، 11-12-2023، پۆلیسی سویسرا بڵاویکردەوە، پێش کاژێر 08:00ـی بەیانی بەکاتی سویسرا (11:00ی بەیانی بەکاتی هەولێر) لە رووداوێکی تەقەکردندا لە شارۆچکەی سیۆن "دوو کەس کوژراون و یەکێکی دیکەش بریندار بوو." پۆلیس دەشڵێت، گەڕان بەدوای تەقەکەرەکەدا بەردەوامە.
پۆلیسی سویسرا ئاماژەی بەوە کرد، تاوەکو ئێستا ناسنامەی تەقەکەرەکە و پاڵنەرەکانی پشت ئەو کارەی نەزانراون. زانیارییە سەرەتاییەکان پێشانی دەدەن کە "تەقەکەرەکە قوربانییەکانی ناسیوە".
لەو راگەیێندراوەی پۆلیسی سویسرادا هاتووە "ئۆپەراسیۆنێکی بەرفراوانیان بۆ دەستگیرکردنی تەقەکەرەکە دەستپێکردووە و داواکاری گشتیی کانتۆنی ڤالیس لێکۆڵینەوە لەبارەی کوشتنی ئەو هاووڵاتییانەوە دەکات".
ژمارەی دانیشتووانی سویسرا نۆ ملیۆن کەسە. بە گوێرەی رێکخراوی سویس ئارمز بۆ راپرسی کە بنکەکەی لە سویسرایە و چاودێری رەوتی جیهانی تووندوتیژی چەکداری دەکات، مەزەندە دەکات کە خەڵکی سڤیل لەو وڵاتە خاوەنی دوو ملیۆن و 300 هەزار چەکی سووک بن.
لەدوای ساڵی 2001ـەوە، سویسرا رووداوی تەقەی بەکۆمەڵی بەخۆیەوە نەبینیوە. بە گوێرەی کۆمەڵەی نیشتمانی چەکی ئەمریکی، سویسرا یەکێکە لەو وڵاتانەی کەمترین رێژەی کوشتنی تێدایە لە جیهاندا.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ