کوردستان بۆ حکومەتی ئەلیکترۆنی سوود لە ئەزموونی ئیستۆنیا وەردەگرێت
رووداو - هەولێر
قوباد تاڵەبانی، جێگری سەرۆكوەزیرانی هه‌رێمی كوردستان لە تالینی پایتەختی ئیستۆنیا لەگەڵ تایمار پیتیرکوپ، جێگری سەرۆکوەزیرانی ئیستۆنیا کۆبووەوە و تاوتوێی چەند پرسێکیان کرد.
بەپێی راگەیێندراوی ماڵپەڕی حکومەتی هەرێمی کوردستان، لە کۆبوونەوەکەدا باس لە پەرەپێدانی پەیوەندییەکانی نێوان هەرێمی كوردستان و ئیستۆنیا كراوە بەتایبەتی لە بواری سوودوەرگرتن لە سیستەمی حكومەتی ئەلیكترۆنیی پێشکەوتووی ئەو وڵاتە و چۆنێتیی سوودوەرگرتنی بۆ هەرێمی كوردستان كە دەبێتە هۆی ئاسانكارییی کاروباری حکومەت و خزمەتی باشتر بە خەڵک.
شاندی ئیستۆنیا قۆناخەكانی حكومەتی ئەلیكترۆنیی وڵاتەكەیان بۆ قوباد تاڵەبانی روونكردووەتەوە. هەروەها ئامادەییان دەربڕیوە بۆ سوودوەرگرتن لێی، هاوكاریی هەرێمی كوردستان بكەن.
ئەمڕۆ دووشەممە 11-3-2019 لەسەر بانگهێشتی سەرۆكوەزیرانی ئیستۆنیا و بەسەردانێكی فەرمی، قوباد تاڵەبانی گەیشتە تالینی پایتەختی كۆماری ئیستۆنیا.
ئامانجی سەردانی شاندی حکومەتی هەرێمی کوردستان، جگە لە بەهێزكردنی پەیوەندییە دوو قۆڵییەكان، ئاشنابوونە بە ئەزموونی پێشكەوتووی ئیستۆنیا لە بوارەكانی حكومەتی ئەلیكترۆنی و بەسیستماتیككردنی دامودەزگاكان لە هەرێمی كوردستان.
ئیستۆنیا ئەندامی یەكێتیی ئەوروپایە، لە ساڵی 1991 وەك یەكێك لە كۆمارەكانی یەكێتیی سۆڤیەتی پێشوو، سەربەخۆیی وەرگرت.