کوردێک بەربژێری سەرۆکی شارەوانیی چوارەم گەورەترین شاری ئەڵمانیایە

رۆژی شەممە، 11ـی کانوونی دووەمی 2025، بێریڤان ئەیماس، جێگری سەرۆکی پەرلەمانی نۆرت راین فێستڤاڵن و بەربژێری هاوپەیمانیی سەوزەکان بۆ سەرۆکی شارەوانیی شاری کۆڵن، لەبارەی بەربژێربوونی بۆ پۆستەکە بە بە ئاڵا شاڵی، پەیامنێری رووداوی گوت، "کۆڵن نەک هەر بۆ من بووەتە ماڵ، کە باکگراوندێکی کوردیشم هەیە، بەڵکو بۆ زۆر کەس لە کوردستانەوە، زۆر دڵخۆش دەبم ئەگەر بێگومان بتوانم لەڕێگەی کارەکامەوە ئیلهامیان پێ بدەم بۆ ئەوەی بەشداری سیاسەتی ناوخۆیی بکەن."

 

بێریڤان دەشڵێت، "بێگومان ئەوەش لەوانەوە دەست پێدەکات، ئەگەر ئەوان مافی دەنگدانیان هەبێت و، دەزانم کە زۆرێک لە ئێستاوە مافی دەنگدانیان هەیە، بە کەڵکوەرگرتن لە دەنگی خۆیان و دەنگدان بە شێوەیەکی دیموکراسی دەتوانین زۆر شت بە دەست بێنین". 

 

پارتی سەوزەکان یەکێکە لە گەورەترین پارتەکانی هەرێمی نۆرت راین فێستیڤالن. لە 115 کورسی پەرلەمانی هەرێمەکە، پارتی سەوزەکان 39 کورسی هەیە و لەگەڵ پارتی کریستیان دیموکرات حکومەتی هەرێمەکەیان پێکهێناوە. 

 

بێریڤان ئاماژەی بەوەش کرد، "بەڕاستی کەشێکی زۆر نایابە. زۆر زۆر سوپاسگوزارم کە بە ئەنجامێکی هێندە بەهێز هەڵبژێردرام، کە خەڵکێکی زۆر لێرە ئامادەبوون، چ سەر بە پارتی سەوزەکان و چ ئەوانی دیکە. زۆر کەس لە کۆمەڵگەی شار لێرە ئامادەیە، لە چینوتوێژە جیاوازەکانەوە، کە چالاکن، لەگەڵ خۆیان رۆحی گەشبینییان هێناوە، منیش ئەم رۆحی گەشبینییە لەگەڵ خۆم دەبەم بۆ ناو بانگەشەی هەڵبژاردن، بۆ دوای هەڵبژاردن، چونکە ئەم شارە پێویستیەتی،  شاری کۆڵن پێویستی بەم رۆحەیە".

 

کۆڵن گەورەترین شاری هەرێمی نۆرت راین فێستیڤاڵن و چوارەم گەورەترین شاری ئەڵمانیایە. ملیۆنێک و 87 هەزار کەس لەو شارەدا دەژین. 

 

سەبارەت بە ئاڵنگارییەکان و پلانی خۆی بۆ پێشخستنی شارەکە، بێریڤان گوتی، "وەکو دەزانن شارەکەمان لە دۆخێکی باشدا نییە. بودجە بەتاڵە، ئێمەش وەک شارەوانییەک، وەک گەورەترین شارەوانیی ئەم وڵاتە و چوارەم گەورەترین شارەوانی لە کۆماری فیدراڵی ئەڵمانیا، ئەرکی زۆر زۆر گەورەمان لەبەردەمدایە، هەربۆیە بە تایبەتی گرنگە کە ب رۆحی گەشبینی، بە دڵ و رۆح پێکەوە گۆڕانکاری بکەین، هەست بەو رۆحە بکەین."

 

بە گوێرەی ماڵپەڕی چاودێری هەڵبژاردنی فیدراڵی ئەڵمانیا، بڕیارە پاییزی ئەم ساڵ هەڵبژاردنی شارەوانییەکانی هەرێمی نۆرت راین فێستیڤالن بکرێت. 

 

 

 

بێریڤان ئەیماس: بەڕاستی کەشێکی زۆر نایابە. زۆر زۆر سوپاسگوزارم کە بە ئەنجامێکی هێندە بەهێز هەڵبژێردرام، کە خەڵکێکی زۆر لێرە ئامادەبوون، چ سەر بە پارتی سەوزەکان و چ ئەوانی دیکە، زۆر کەس لە کۆمەڵگەی شار لێرە ئامادەیە، لە چین و توێژە جیاوازەکانەوە کە چاڵاکن، لەگەڵ خۆیان رووحی گەشبینییان هێناوە، منیش ئەم رووحی گەشبینییە لەگەڵ خۆم دەبەم بۆ ناو بانگەشەی هەڵبژاردن، بۆ دوای هەڵبژاردن، چونکە ئە شارە پێویستیەتی، شاری کۆڵن پێویستی بەم رووحەیە. وەکو دەزانن شارەکەمان لە دۆخێکی باشدا نییە. بودجەی بەتاڵە، ئێمەش وەکو شارەوانییەک، وەک گەورەترین شارەوانیی ئەم هەرێمە و چوارەم گەورەترین شارەوانی لە کۆماری فیدراڵیی ئەڵمانیا، ئەرکی زۆر زۆر گەورەمان لەبەردەمدایە، هەربۆیە بە تایبەتی گرنگە کە بە رووحی گەشبینی، بە دڵ و رووح پێکەوە گۆڕانکاری بکەین، هەست بەو رووحە بکەین. 

 

 

بێریڤان ئەیماس: کۆڵن بووەتە ماڵ نەک هەر بۆ من، کە باکگراوندێکی کوردیشم هەیە، بەڵکو بۆ زۆر کەس لە کوردستانەوە. زۆر دڵخۆش دەبم ئەگەر بێگومان بتوانم لەڕێگەی کارەکەمەوە ئیلهامیان پێ بدەم بۆ ئەوەی بەشداریی سیاسەتی ناوخۆیی بکەن. بێگومان ئەوەش لە ئەوانەوە دەست پێدەکات، ئەگەر ئەوان مافی دەنگدانیان هەبێت و دەزانم کە زۆرێک لە ئێستاوە مافی دەنگدانیان هەیە - کەڵکوەرگرتن لە دەنگی خۆیان و دەنگدان بە شێوەیەکی دیموکراسی دەتوانین زۆر شت بە دەست بهێنین.