خەڵاتی نۆبڵ بۆ ئاشتی دەبەخشرێتە نێرگس محەممەدی کە لە تاران زیندانیکراوە

 

حەمیدرەزا محەمەدی، برای نێرگس محەمەدی گوتی " ئەو، ئەمڕۆ لەگەڵ ئێمەدا نییە. ئەو لە زینداندایە و بۆ پشتگیرکردن لە مافی کەمینە ئایینییەکانی ئێران دەستی بە مانگرتن کردووە. هەرچەندە نێرگس لەگەڵ ئێمەدا نییە، بەڵام بە دڵ و گیانمان هەست بە بوونی دەکەین."

 

نێرگس محەمەدیی تەمەن 51 ساڵ، لە دایکبووی زنجانی ئێران بۆ زیاتر لە دوو دەیەیە چالاکڤانی مافی مرۆڤە و لە ناڕەزایەتییەکانی ساڵی 2009ـی ئەو وڵاتە، دوو جار زیندانی کراوە و جاری سێیەم کە لە ساڵی 2021 بوو، خرایە زیندانی ئێڤین و تاوەکو ئێستاش دەستبەسەرە؛ هاوژین و منداڵەکانی محەمەدی لە دەرەوەی ئێران دەژین و زیاتر لە هەشت ساڵە یەکدییان نەبینیوە.

 

کیانا رەحمانی، کچی نێرگس محەممەدی دەڵێ "دەبێت لە درووشمی ژن، ژیان، ئازادی تێبگەین تاوەکو لە قوربانیی دایکم و ژنانی دیکە لەپێناو ئازادی و دیموکراسی تێبگەین. سەبارەت بە بینینەوەی دایکم، رەشبینم چونکە دەزانم پێدانی خەڵاتی نۆبڵ بە دایکم، وا لە رژێمی ئێرانی دەکات گوشارەکانی سەری زیاتر بکات و ئازادییەکانی سنووردارتر بکات."

 

نێرگس محەمەدی پێشتریش خەڵاتی بۆ چالاکییەکانی لەپێناو مافەکانی مرۆڤ وەرگرتووە، لەوانە خەڵاتی ساخارۆف لە ساڵی 2018؛ مەدالیای ئازایەتیی پەیامنێرانی بێ سنوور لە ساڵی 2022 و ئەمساڵیش براوەی هەردوو خەڵاتی ئازادیی رۆژنامەگەریی پێنی ئەمریکا و خەڵاتی ئازادی رۆژنامەگەریی نەتەوە یەکگرتووەکان بوو.