قەیرانی کەڵەکەبوونی خۆڵ و خاشاک لە تونس خۆپێشاندانی لێدەکەوێتەوە و کەسێکی تێدا کوژرا
رووداو دیجیتاڵ
دوای ئەوەی وەزارەتی ژینگەی تونس بڕیاری دا چاڵێکی خۆڵ و خاشاک هەڵبداتەوە و خاشاکی زیاتری تێ بکات، خەڵکی عەقاریب دەستیان بە خۆپێشاندان کرد، دوای دروستبوونی گرژی و رووبەڕووبوونەوە، بەپێی میدیا نێوخۆییەکانی وڵاتەکە، کەسێک بەهۆی هەڵمژینی بڕێکی زۆری گازی فرمێسکڕێژ گیانی لەدەستدا.
ماوەی چەند هەفتەیەکە لە تونس هەزاران تۆن خۆڵ و خاشاک لە بەشێکی زۆری وڵاتەکە کەڵەکەبوون. وەزارەتی ژینگەی تونس بڕیاری دا بۆ چارەسەرکردنی دۆخەکە چاڵێکی خۆڵ و خاشاک هەڵبداتەوە کە چەند مانگێک لەمەوپێش لەسەر داواکاریی خەڵکی عەقاریب پڕکرابووەوە، خەڵکی ناوچەکە پێیان وابوو ئەو چاڵە زیانی بە تەندروستییان گەیاندووە، بۆیە داوای پڕکردنەوەیان کرد و دوای بڕیاری هەڵدانەوەشی دەستیان بە خۆپێشاندان کرد.
رۆژی سێشەممە سەتان گەنجی تونسی کۆبوونەوە و دەستیان بە خۆپێشاندان کرد، بە گوتەی شایەتحاڵان ئاگریان لە بنکەیەکی پۆلیس بەرداوە، بە بەرد هێرشیان کردووەتە سەر هێزەکانی پۆلیس و چەند شەقامێکیشیان داخستووە.
وەزیری ناوخۆی تونس رەتیدەکاتەوە کە ئەو گەنجە بەهۆی گازی فرمێسکڕێژەوە کوژرابێت و دەڵێت، کەسەکە دۆخی تەندروستیی جێگیر نەبووە و پەیوەندیی بە خۆپێشاندانەکەوە نییە.
لە تونس لە جێگەی ئەوەی خۆڵ و خاشاک بسوتێنرێت، چاڵێک هەڵدەکەنرێت و خاشاکی تێدەکەن. بەو شێوەیە رێگە لە پیسبوونی هەوا دەگرن و دوای چەند ساڵێکیش ماددە خۆراکییەکان شی دەبنەوە و دەبنە سەرچاوەی خۆراکی بۆ خاکەکە.
ئەوە یەکەم تاقیکردنەوەی حکومەتەکەی نەجلا بۆدنە کە مانگی رابردوو لەلایەن قەیس سەعید، سەرۆکی تونس وەکو سەرۆکوەزیرانی وڵاتەکە دەستبەکاربوو.
ژمارەی دانیشتووانی تونس دەگاتە 11 ملیۆن و یەکێکە لەو وڵاتانەی لە بەهاری عەرەبیدا دەسەڵاتی گۆڕی و سەرکەوتووش بوو، بەڵام ئەمساڵ دووبارە بەشێک لە قەیرانەکان سەریان هەڵدایەوە و لە مانگی حوزەیران سەرۆکی وڵاتەکە داوای هەڵوەشاندنەوەی حکومەتی کرد.