تورکیا داوا دەکات لە گفتوگۆکانی نوێکردنەوەی رێککەوتنی دانەوێڵە رووسیا پەراوێز نەخرێت

 

رۆژی یەکشەممە، 10ی ئەیلوولی 2023، رەجەب تەیب ئەردۆغان، سەرۆککۆماری تورکیا لە کۆنگرەیەکی رۆژنامەڤانیدا و لە کاتی کۆتاییهاتنی لووتکەی جی20 رایگەیاند: "هەر هەوڵێک بۆ نوێکردنەوەی رێککەوتنی ناردنی گەنم بە دەریای رەشدا، رووسیا تێیدا پەراوێزبخرێت سەرکەوتوو نابێت."

 

سەرۆککۆماری تورکیا ئاماژەی بەوە کرد، کۆبوونەوەیەک لەنێوان نوێنەرانی رووسیا، نەتەوە یەکگرتووەکان و ئۆکراینا بە ئامانجی نوێکردنەوەی رێککەوتنەکە ئەنجامدەدرێت بەبێ ئەوەی ئاماژە بە شوێن و کاتی کۆبوونەوەکە بکات. 

 

پار بە نێوەندگیریی تورکیا و نەتەوەیەکگرتووەکان، رووسیا و ئۆکراینا رێککەوتنێکیان بۆ هەناردەکردنی گەنمی ئۆکراینا بە دەریای رەشدا واژۆکرد و رێککەوتنەکە لە 17 تەممووز جێبەجێکرا و بۆ ماوەی ساڵێک بەردەوامبوو. 

 

دوای ئەوەی رووسیا بەهۆی جێبەجێنەکردنی داواکارییەکانییەوە ئامادەنەبوو رێککەوتنەکە درێژبکاتەوە، رێککەوتنی هەناردەکردنی گەنم و دانەوێڵە لە نێوان ئۆکراینا و رووسیا نوێنەکرایەوە، ئەوەش بە گوێرەی راگەیێندراوێکی کۆشکی سەرۆکایەتی رووسیا. یەکێک لە مەرجەکانی روودسیا نەهێشتنی رێگری بوو بۆ هەناردەکردنی بەروبوومە خۆراکییەکانی وڵاتەکەی. 

 

رێکخراوی خۆراک و کشتوکاڵی سەر بە نەتەوە یەکگرتووەکان، ناسراو بە (فاو) رایگەیاند: بەهۆی رێککەوتنی گەنمی نێوان رووسیا و ئۆکرایناوە 33 ملیۆن تۆن گەنمی ئۆکراینا هەناردەی بازاڕەکانی جیهان کرا، ئەوەش نرخی خۆراکی لە بازاڕەکاندا بە رێژەی نزیک لە 20٪ دابەزاند.