زانایەکی مەغریبی: داهێنانێکم کردووە بە پێنج خولەک پاتریی ئۆتۆمبێلی کارەبایی بارگاویی دەکاتەوە

 

رەشید یەزەمی بە میدیای وڵاتەکەی گوتووە، لە رێگەی ئەو تاقیکردنەوانەی بەم دواییە لەگەڵ تیمەکەی ئەنجامیداون، توانیویانە پاتریی لیسیۆم بە پێنج خولەک تەواو بارگاوی بکەنەوە، ئەوەش 17٪ لەو کاتە پێوانەییە کەمترە کە پێش دوو ساڵ هەمان زانا تۆماریکردبوو کە شەش خولەک بوو. 

 

یەزەمی باس لەوە دەکات بارگاویکردنەوەی پاترییەکان لە 20٪ـەوە بۆ 80٪ بە رێگەی کۆن پێویستی بە لانیکەم بە 30 خولەک هەیە، بەڵام ئەو تاقیکردنەوەیەی کە ماوەیەک لەمەوبەر لە سینگاپوور کردوویەتی، دەتوانێت پاتریەکە ئەوپەڕی بە کەمتر لە 15 خولەک بارگەی پاترییەکە بگەیێنێتە 100٪. 

 

هەروەها باسی لەوە کردووە کە نوێترین لێکۆڵینەوەکانی، کاتی پێوانەیی بارگاویکردنەوەیان تۆمارکردووە، ئەوەش دوای ئەوەی کە توانی بە پێنج خولەک پاتریی لیسیۆم 100٪ بارگاویی بکاتەوە. 

 

یەزەمی جەختی لەوە کردەوە کە ئەو تەکنیکە نوێیەی بارگاویی کردنە، بۆ هەموو جۆرەکانی پاتری دەشێ، لە پاتریی مۆبایلەوە تا دەگاتە ئۆتۆمبێلە کارەباییەکانی تێسلا. 

 

بە گوێرەی میدیای مەغریبی، لێکۆڵینەوەی یەزەمی بەشێکە لە پڕۆژەیەکی زانستی لە زانکۆی "یان یانگ"، کە ئامانج لێی شوێنگرتنەوەی لیسیۆمە بە ماددەی فلۆر، بەهۆی ئەوەی کە ماددەیەکی باوترە و تێچووی دەرهێنانیشی کەمترە. 

 

یەزەمی لە ساڵی 1953 لە شاری فاسی باکووری مەغریب لە دایکبووە و هەر لەوێش خوێندنی سەرەتایی و ناوەندنی تەواوکردووە. لە شاری ریباتی پایتەختی ئەو وڵاتە زانکۆی خوێندووە، ساڵی 1972 وڵاتەکەی جێهێشتووە و چووەتە فەرەنسا.