ڤایبەر و پەبجی لەسەر سیستەمی IOS کەوتنەوە کار
رووداو دیجیتاڵ
پاشنیوەڕۆی ئەمڕۆ هەینی 10-7-2020 زۆربەی ئەپلیکەیشنەکانی سیستەمی IOS لەکارکەوتن، لەوانە تۆڕی کۆمەڵایەتیی ڤایبەر، بەرنامەی سپۆتیفای و ئەپلیکەیشنی پەبجی. دوای زیاتر لە کاژێرێکیش بەپێی گوتەی بەکارهێنەرانی وێبسایتی داون دیتێکتەر ئەو بەرنامانە چالاکبوونەتەوە.
کێشەکە بەجۆرێک بوو بەکارهێنەرانی سیستەمی IOS نەیاندەتوانی ئەپلیکەیشنی ڤایبەر و سپۆتیفا بکەنەوە و لەکاتی کردنەوەیدا راستەوخۆ دادەخرایەوە.
بەپێی ماڵپەڕی داون دیتێکتەر، کە چاودێریی تۆڕی ئینتەرنێت دەکات، بەکارهێنەرانی ڤایبەر و سپۆتیفای لە ئەوروپا و رۆژهەڵاتی ناوەڕاست و ئەمریکا ئەو کێشەیان هەبووە.
کۆمپانیای ڤایبەر لە ئەکاونتی فەرمیی خۆی لە توویتەر رایگەیاندووە، هەزاران ئەپلیکەیشن "لەنێویاندا ڤایبەر" لەسەر سیستەمی IOS لەکارکەوتوون، ئەوەش بەهۆی کێشەیەکی تەکنیکییەوەیە و "هەوڵدەدرێت بە زووترین کات چارەسەربکرێت"؛ داواشی کرد کە بەکارهێنەرانی ئەو تۆڕە ئەپلیکەیشنەکە نەسڕنەوە و دووبارە دایبەزێننەوە، چونکە ئەوە کێشەکە چارەسەرناکات.
چارەسەرێکی کاتی بۆ کردنەوەی ئەپلیکەیشنەکان، بەتایبەتی ڤایبەر، بەپێی ماڵپەڕی The Verge بریتی بوو لە کوژاندنەوەی هێڵی ئینتەرنێت و پاشان کردنەوەی ئەپلیکەیشنی ڤایبەر، دواتر دەکرێت ئینتەرنێت بکەیتەوە، بەڵام بەمەرجێک ئەپلیکەیشنەکە دانەخەیت، ئەگەر کێشەکە دروستبووەوە هەمان هەنگاوەکان دووبارەبکەرەوە.
هاوکات بەکارهێنەرانی ئەپلیکەیشنی پەبجی هەمان کێشەیان هەبوو و ئەکاونتی فەرمیی ئەپلیکەیشنەکە لە توویتەر رایگەیاندووە، ئاگاداری ئەو کێشەیەن کە لە سیستەمی IOS دا هەیە و کێشەکە بۆ زۆر لە ئەپلیکەیشن و یارییەکان دروستبووە، هەوڵی چارەسەرکردنی دەدەین.
بەشێک لە شارەزایانی بواری IT دەڵێن، سیستەمی Facebook SDK سەرچاوەی کێشەکەیە و ناهێڵێت بەرنامەکان بکرێنەوە.