بەهۆی لافاوەوە لە رووسیا و کازاخستان زیاتر لە 110 هەزار کەس ئاوارە بوون

 

 

زیاتر لە پێنج رۆژە بەهۆی خێرا توانەوەی بەفری سەر رووباری ئۆرال کە بەنێو رووسیا و کازاخستاندا تێدەپەڕێت و بڕێکی زۆری ئاوی رژاندووەتە نێو شارەکانی کەنار رووبارەکە، هەردوو وڵاتەکە باری نائاساییان راگەیاندووە. 

 

رۆژی سێشەممە، 10ـی نیسانی 2024، وەزارەتی فریاگوزاری کازاخستان رایگەیاند، بەهۆی روودانی لافاوەوە تەنیا لە کازاخستان زیاتر لە 97 هەزار کەس ئاوارە بوون، لەو ژمارەیەش لانیکەم 12 هەزاریان بردراونەتە رووسیا.

 

باشووری چیاکانی ئۆرال کە دەکەوێتە دووری 1,200 کیلۆمەتری رۆژهەڵاتی مۆسکۆ زۆرترین کاریگەری لافاوەکەی لەسەرە و بەرپرسان رایانگەیاندووە، هێزەکانی بەرگریی شارستانی لەو ناوچانە خراونەتە حاڵەتی ئامادەباشییەوە. 

 

لە کازاخستانیش ناوچەکانی رۆژهەڵات و باکووری وڵاتەکە زۆرترین کاریگەری لافاوەکەیان لەسەر بووە. دەرگای قوتابخانەکان داخراون و داوا لە خەڵک کراوە لە ماڵەکانیان نەچنە دەرەوە. 

 

کۆشکی سەرۆکایەتیی رووسیا – کرێملن رایگەیاند، لەو شارانەی رووسیا کە دەکەونە سەر رووبارەکە زیاتر لە 12 هەزار کەسییان گواستووەتەوە ناوچەکانی دوور لە رووبارە. 

 

بەگوێرەی ئەو ئامارانەی بەرپرسانی رووسیا و کازاخستان بڵاویانکردووەتەوە، لە هەردوو وڵات زیاتر لە 550 هەزار خانوو بەر لافاوەکە کەوتوون.