لە سوێد لە مانگی رابردوودا 7 هەزار و 879 کەس مافی مانەوەیان پێدراوە
رووداو دیجیتاڵ
سوێد دەستی بە جێبەجێکردنی سیاسەتی سەختکردنی پێدانی مافی مانەوە کردووە. داتا فەرمییەکان پێشانیدەدەن کە ژمارەی ئەوانەی لە مانگی دووی ئەمساڵدا مافی مانەوەیان پێدراوە کەمترە لە ژمارەی مانگەکانی پێشتر.
سوێد دەیەوێت زۆرترین مافی مانەوە یان ئیقامە بۆ کار بداتە ئەوانەی دەچنە ئەو وڵاتە و کەمترین ئیقامەی سیاسی و پەنابەری بدات. ئەمە ئەو داتایانە دەریدەخەن کە حکومەتی سوێد سەبارەت بە مانگی دووی ئەمساڵ بڵاوی کردوونەتەوە.
بەپێی ئەو داتایانە لەو مانگەدا 7879 کەس مافی مانەوەیان دراوەتێ. لەو ژمارەیەش تەنیا 1520 کەس مافی مانەوەیان وەکو پەنابەر وەرگرتووە.
زۆرترین ئیقامە بۆ کار دراوە و بەدواشیدا مافی مانەوە دراوەتە ئەندامانی خێزانی ئەوانەی پێشتر لە سوێد مافی مانەوەیان وەرگرتووە، هەروەها ئەوانەش کە بۆ خوێندن ڤیزا و مافی مانەوەیان پێدراوە زیادیکردووە و لە مانگی دوو دا گەیشتووەتە 505 کەس.
حکومەتی ئێستای سوێد حکومەتێکە کە پشتیوانی پارتە راستئاژۆکان دامەزراوە و لە کاتی هەڵبژاردنەکانیشدا ئەو پارتانە بەڵێنی ئەوەیان بە دەنگدەرانیان دابوو کە ئەگەر بەشداربن یان پشتیوانیی حکومەتی نوێ بکەن، هەوڵبدەن رێگەی کۆچبەری و مانەوە بۆ سوێد سەخت بکەن.
لە سەرەتای ئەمساڵەوە سوێد سەرۆکایەتیی خولی شەش مانگەی یەکێتیی ئەوروپاش دەکات. ئەمەش پەرۆشیی حکومەتەکانی دیکەی ئەوروپای سەبارەت بە سیاسەتی کۆچبەریی یەکێتییەکە زیادکردووە.
ئێستا لە سوێد 300 هەزار کەس مافی مانەوەی هەمیشەییان هەیە و بەپێی زانیاری دەزگەی كۆچی سوێد ئێستا 90 هەزار كەس داواكارییان پێشكەش كردووە بۆ وەرگرتنی وڵاتینامەی سوێدی. تەنیا 150 كارمەندی ئەو دەزگایەش لەو داواكاریانە دەكۆڵنەوە. ئەوەش وایكردووە هەر كەیسێك 30 مانگ لە نۆرەدا بێ.