پۆلیسی ئیسپانیا: 77 قاچاخچیی کۆچبەرانمان دەستگیرکرد

 

 

رۆژی پێنجشەممە، 8ی ئابی 2024، پۆلیسی ئیسپانیا رایگەیاند، ئەو 77 قاچاخچییەی دەستگیرکراون خەڵکی وڵاتانی مەکسیک، بۆلیڤیا، لیبیا، ئیتاڵیا و ئیسپانیا بوون. شەش لە دەستگیرکراوەکان تۆڕەکەیان بەڕێوەبردووە. هەروەها، لەو ئۆپەراسیۆنەدا 10 ماڵیان پشکنیووە و دەستیان بەسەر 545 هەزار دۆلاردا گرتووە. 

 

پۆلیسی ئیسپانیا دەڵێت، ئەندامانی تۆڕەکە کۆچبەرانی هیندی و پاکستانیان بردووەتە ئەمریکا و کەنەدا و کۆچبەرانی بۆلیڤیاشیان بردوونەتە ئیسپانیا، بۆ هەر کۆچبەرێک هەشت هەزار و 700 بۆ 100 هەزار و 900 دۆلاریان وەرگرتووە. 

 

بەگوێرەی راگەیەندراوەکەی پۆلیسی ئیسپانیا، قاچاخچییەکان کۆچبەرانیان لە پاکستان و هیندستانەوە بردووەتە بەحرەین، پاشان بۆ میسر و دواتر بۆ لیبیا. لەوێوە بە بەلەم بردوویانن بۆ ئیتاڵیا. لەوێوە بۆ ئیسپانیا و پاشان مەکسیک. لەوێشەوە بۆ ئەمریکا و کەنەدا. بەشێکیشیان کۆچبەرانیان لە بۆلیڤیاوە بردوونەتە میسر و لیبیا، دواتریش بۆ ئیسپانیا و وڵاتانی دیکەی ئەورووپا. 

 

200 کارمەندی پۆلیس کاریان لەو ئۆپەراسیۆنەدا کردووە کە جگە لە پۆلیسی ئیسپانیا، بەشێکیان پۆلیسی ئەورووپا و کارمەندی وەزارەتی ناوخۆی ئەمریکا بوون.

 

ئیسپانیا بە یەکێک لەو وڵاتانە دادەندرێت کە کۆچبەرێکی زۆری بۆ دەچێت. بەگوێرەی ئاماری فەرمی، پار 56 هەزار و 852 کۆچبەر چوونە ئەو وڵاتە کە 82٪ لە پێرار زیاتر بوو.