پیاوێکی فەلەستینی لە ماڵە رووخاوەکەی دەڕوانێت. وێنە: AFP
رووداو دیجیتاڵ
دوای شەڕێکی سێ رۆژە کە کوژران و برینداربوونێکی زۆری لێکەوتەوە، ئیسرائیل و بزووتنەوەی سەرایا قودسی باڵی سەربازی بزووتنەوەی جیهادی ئیسلامی رێککەوتن ئاگربەستی شەڕ رابگەیێنن.
ئاگربەستەکە شەوی یەکشەممە کاژێر 11:30 خولەک بە نێوەندگیری میسر چووە واری جێبەجێکردنەوە. سەرۆکوەزیرانی فەلەستینیش داوای بەدەنگەوە هاتنی کۆمەڵگەی نێودەوڵەتی دەکات.
محەممەد ئشتییە، سەرۆكوەزیرانی فەلەستین رایگەیاند، "ئەوەی لە ئەنجوومەنی ئاسایش داوا دەکرێت، بڕیارێکی جیددی و جێبەجێکراوە بۆ دابینکردنی ئاسایش بۆ گەلی فەلەستین. ئێمە زیاتر لە سەرکۆنەکردن ئەمەمان لە دامەزراوەکە دەوێت. ئێمە دەڵێین: بەسە بە دووفاقی و سیاسەتی دووفاقی لە مامەڵەکردن لەگەڵ پرسەکانی مافی مرۆڤ و قەیران و ململانێ نێودەوڵەتییەکان."
لە شاری ئەشقەڵۆنی باشووری ئیسرائیل، مووشەکێک کەوتووەتە خوارەوە و زیانی بە چەند ئۆتۆمبێل و باڵەخانەیەک گەیاندووە. ئیسرائیلیەکانیش بۆ قوربانییەکانی غەززە و زەرەو زیانەکانی ئیسرائیل، سەرکردایەتی جیهادی ئیسلامی تۆمەتبار دەکەن.
بێنی گانتز، وەزیری بەرگریی ئیسرائیل ئاماژەی بەوە کرد، "سەرکردایەتی جیهادی ئیسلامی کە لە دەرەوەی وڵات لە چێشتخانە و هۆتێلەکانی تاران و سوریا و لوبنان دانیشتوون، پەیوەندییان لەگەڵ خەڵکدا پچڕاوە و زیانێکی گەورە بە ژیان و بژێوی خەڵکی غەززە دەگەیێنن. ئەوان باجەکەی دەدەن. سوپای پاسدارانی ئێران نانی خەڵکی غەززە نادات. چالاکی و ئۆپەراسیۆنەکانمان لە دژی ئەنجامدەرانی تیرۆر بەردەوام دەبێت و چڕتر دەبێتەوە بەبێ سنوور و سنووردارکردن."
بەهۆی هێرشەکانی ئیسرائیل بۆسەر غەززە؛ 41 کەس کوژراون لەنێویاندا 15 منداڵ و چوار ژن هەن؛ 311 کەسیش بریندارن. لە کاردانەوەدا لە کەرتی غەززەوە 935 مووشەک ئاراستەی ئیسرائیل کراون.
دوای ئەوەی ژمارەی قوربانییەکان بەردەوام هەڵکشان، پێشبینی دەکرێت رۆژێک دوای ئاگربەستەکە دۆخەکە هێور ببێتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ