جیهان
هێزە ئەمنییەکان لەکاتی هەڵگرتنەوەی تەرمەکان، وێنە: کۆمەڵەی غەوسی جەزائیری بۆ گەڕان و بەهاناوەچوون
رووداو دیجیتاڵ
12 کۆچبەری خەڵکی رۆژئاوای کوردستان و سووریا لە رێگەیان بەرەو ئەورووپا، لە بیابانێکی جەزائیر لە تینوویێتیدا گیانیان لەدەستدا.
کۆمەڵەی غەوسی جەزائیری بۆ گەڕان و بەهاناوەچوون رایگەیاند، دوو هاووڵاتی جەزائیریش کە یەكێکیان شوفێر و ئەوەی دیکە یاوەری بووە، لەگەڵ 12 کۆچبەرەکەدا گیانیان لەدەستداوە.
کۆمەڵەکە باسی لەوە کردووە، ئۆتۆمبێلێکی تۆیۆتای رەنگ سپی و ژمارەیەک تەرم لە نزیکی، لە ناوچەی بیابانی حاسی بەلفەبۆر لە رۆژهەڵاتی جەزائیر دۆزراونەتەوە.
بە گوتەی رێکخراوە مرۆییەکە، ئۆتۆمبێلەکە لە رۆژی سێشەممەی رابردووەوە بێسەروشوێن ببوو و دوێنێ (یەکشەممە) دوای چەند کاژێرێک لە گەڕان، تەرمەکان دۆزراونەتەوە.
بەپێی لیستی ناو و زانیاری لەبارەی کۆچبەرەکان کە رێکخراوەکە بڵاویکردووەتەوە، سێ لەو کۆچبەرانە خەڵکی حەسەکەی رۆژئاوای کوردستانن، سێیان خەڵکی رەققەن، 5ـی دیکەیان خەڵکی حەلەب و ئەوەی دیکەشی خەڵکی دیمەشقە.
رێکخراوەکە وێنەی شوێنی تەرمەکانی بڵاوکردووەتەوە کە پێشانیدەدەن بە کیسەی سپی، پۆشراون و بۆنیتی ئۆتۆمبێلەکەیان کراوەتەوە.
بە گوێرەی سەرچاوە خۆجێیەکان، سێ کەسەکەی پارێزگەی رەقەی سووریا، بران و تەمەنیان 10، 18 و 23 ساڵن.
ساڵی رابردوو 212 هەزار و 100 کۆچبەر چوونەتە هەر سێ وڵاتی لیبیا، توونس و جەزائیر و بە دەریای نێوەڕاستدا پەڕیونەتەوە ئەورووپا.
هەر ساڵی رابردوو 3105 کۆچبەر لە رێگەی چوون بۆ ئەورووپا لە دەریای نێوەڕاست گیانیان لەدەستداوە یان بێسەروشوێن بوون.
.jpg "رێکخراوەکە ئەم لیستەی ناوی قوربانییەکانی بڵاوکردووەتەوە")
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ