پۆلیسی بولگاریا بە تەقەکردن لە پەناخوازێکی سووری تۆمەتبار دەکرێت

 

 

گولـلەکە بەر قۆڵی عەبدوڵڵا کەوتووە و دواتر لە سینگی گیراوەتەوە، کۆچبەرەکانی دیکە بە هانای عەبدوڵڵاوە دەچن و رزگاری دەکەن. ئەو پەناخوازە کە سوورییە، پۆلیسی بولگاریی تۆمەتبار کردووە بەوەی تەقەیان لێکردووە، تاوەکو رەوانەی نێو خاکی تورکیایان بکەنەوە.

 

بەدواداچوونەکانیش تۆمەتەکەی عەبدوڵڵا پشتڕاست دەکەنەوە. کلاس ڤان دایکن، رۆژنامەڤان دەڵێت، "ئێمە لەڕێگەی بەرنامەی (جیۆ لۆکەیشن)، شوێنی ڤیدیۆی ساتی تەقەکردنەکەمان دۆزییەوە و بەپێی ئەوەش دەتوانین بڵێین تەقەکان لەلای سنووری بولگارییەکانەوە کراون."

 

بەڵام بولگارییەکان ئەو تۆمەتانە رەتدەکەنەوە. ئیڤان دیمیردژێڤ، وەزیری نێوخۆی بولگاریا رایگەیاند، "هیچ کەیسێکی تووندوتیژی دژی کۆچبەران نییە. لە مانگ و نیوی رابردوودا روونمکردووەتەوە، هەندێک ئاژانسی میدیایی دەیانەوێت وێنەیەکی جیاواز بڵاوبکەنەوە. لەگەڵ هاوکارانی تورکیا لێکۆڵینەوەمان لەو رووداوە کردووە و هیچ ئاماژەیەکی روون نییە لەلایەن هەردوولاوە، کە بەڵگە هەبێت پۆلیسی بولگاری تەقەی کردووە و هیچ کردارێکی پێشێلکاریی مافەکانی مرۆڤ نەبووە."

 

یەکێتیی ئەوروپا داوای لێکۆڵینەوەی ورد لە بریندارکردنی عەبدوڵڵا دەکات. ئانیتا هیبەر، گوتەبێژی کۆمیسیۆنی ئەوروپا دەڵێت، "چاوەڕێ دەکەین دەسەڵاتدارانی بولگاری لێکۆڵینەوە لە هەر تۆمەتێک بکەن و بە شێوەیەکی چالاکانە بەدواداچوونی بۆ بکات. هەموو تۆمەتێک لەسەر هەر رووداوێک کە لەسەر سنوورەکانی ئەوروپا روودەدەن، بە هەندی وەردەگرین و کەیسی گیانلەدەستدان و تووندوتیژیش قبووڵکراو نین."

 

بەگوێرەی ئاماری حکومەتی بولگاریا، ئەمساڵ ژمارەی کۆچبەران لەو رێگەیەوە بەشێوەیەکی بەرچاو زیادیکردووە. لە هەشت مانگی یەکەمی ئەمساڵدا، نزیکەی 85 هەزار کۆچبەر لە تورکیاوە چوونەتە نێو خاکی بولگاریاوە.