سەرۆکی ئۆکراینا: درۆن و مووشەکی ئێرانی بوونەتە هۆی دواخستنی ئاشتی

 

 

ئێوارەی رۆژی یەکشەممە 6ی تشرینی دووەمی 2022 ڤۆلۆدیمیر زیلینسکی، سەرۆکی ئۆکراینا لە پەیامێکی ڤیدیۆییدا گوتی، رۆژی یەکشەممە سوپای رووسیا درۆنی ئێرانی بەکارهێنایەوە و سوپای وڵاتەکەی بەشێکیانی خستە خوارەوە، بەڵام بەشێکیشیان ئامانجەکانیان پێکاوە.

 

بە گوتەی سەرۆکی ئۆکراینا، لایەنی رووسی بە بەکارهێنانی مووشەکی ئێرانی ژێرخانی وزەی وڵاتەکە دەکاتە ئامانج و ئەوەش وایکردووە، "4.5 ملیۆن کەس بێ کارەبا بمێننەوە."

 

زیلینسکی ئاماژە بەوەش دەکات، لەگەڵ ئورسولا ڤۆندێرلاین، سەرۆکی کۆمیسیۆنی یەکێتیی ئەوروپا تاوتوێی گوشارخستنە سەر ئێرانیان کردووە.

 

رۆژی شەممە 5ی تشرینی دووەم، حوسێن ئەمیرعەبدوڵڵاهیان، وەزیری دەرەوەی ئێران رایگەیاند، ئەوان "چەند مانگێک پێش دەستپێکردنی جەنگی ئۆکراینا" درۆنیان بە رووسیا داوە، بەڵام رەتیکردەوە مووشەکیان بەو وڵاتە دابێت.

 

هاوکات، کیێڤ و وڵاتانی رۆژئاوا ئەو گوتانە رەتدەکەنەوە و جەخت لەوە دەکەنەوە کە نەک هەر درۆن، بەڵکو رووسیا مووشەکیشی لە ئێرانەوە بەدەستگەیشتووە.

 

بەرپرسانی ئۆکراینا دەڵێن، لە شوباتی ئەمساڵەوە لانیکەم 400 درۆنی دروستکراوی ئێرانیان خستوونەتە خوارەوە و باس لەوەش دەکەن رووسیا داوای 2000 درۆنی شاهیدی لە ئێران کردووە.