هاندەرانی تورکیا و هۆڵەندا لە دەرەوەی یاریگە لە بەرلینی ئەڵمانیا بووە شەڕیان
رووداو دیجیتاڵ
دوای ئەوەی تورکیا لە قۆناخی چارەگی کۆتایی بە هۆڵەندا دۆڕا، گرژی لەنێوان هاندەرانی هەردوو هەڵبژاردە دروستبوو و پۆلیس چەند کەسێکی دەستگیرکرد.
شەوی رابردوو یاریی نێوان هەردوو هەڵبژاردەی تورکیا و هۆڵەندا لە چارەگی کۆتایی جامی یۆرۆی 2024 کرا. هۆڵەندا بە ئەنجامی 2-1 لە تورکیای بردەوە و خۆی گەیاندە قۆناخی پێش کۆتایی.
دوای یاریەکە، هاندەرانی تورکیا و هۆڵەندا لە دەرەوەی یاریگە لە بەرلینی ئەڵمانیا بووە شەڕیان. بەگوێرەی چەند سەرچاوەیەک، هاندەرانی هەڵبژاردەی تورکیا شەڕەکەیان دەستپێکردووە و هێرشیان کردووەتە سەر هاندەرانی هەڵبژاردەی هۆڵەندا.
یارییەکانی یۆرۆی 2024 لە ئەڵمانیا بەڕێوەدەچن. پۆلیسی ئەڵمانیا رایگەیاند، چەند کەسێکیان دەستگیرکردووە کە هۆکاری دروستبوونی گرژییەکە بوون.
نزیکەی 2.8 ملیۆن پەنابەری خەڵکی باکووری کوردستان و تورکیا لە ئەڵمانیا دەژین.
گرژی لە چەند شارێکی هۆڵەنداش دروستبوو.
لە ڤیدیۆیەکی تۆڕە کۆمەڵایەتییەکاندا چەند پەنابەرێکی خەڵکی تورکیا دەردەکەون، کە چوونەتە سەر شەقامەکانی ئەمستەردام و بە ئاماژە و جوێن، بێڕێزیی بە هەڵبژاردەی هۆڵەندا دەکەن.
لە یارییەکەی نێوان تورکیا و هۆڵەندا، سەمەد ئەکایدن لە خولەکی 35 گۆڵی یەکەمی هەڵبژاردەی تورکیای تۆمارکرد و گێمی یەکەم بەو ئەنجامە کۆتایی هات. لە خولەکی 70ـدا ستێفان دی فریخ توانی گۆڵی یەکەمی هەڵبژاردەی هۆڵەندا تۆمار بکات.
لە خولەکی 76ـیشدا مەرت موڵدور، بەرگریکاری هەڵبژاردەی تورکیا و یانەی فەنارباخچێ بە هەڵە گۆڵی لەخۆیان تۆمارکرد و بەو شێوەیە هۆڵەندا پێشکەوت.
هۆڵەندا توانی بەو ئەنجامە بیباتەوە و لەگەڵ هەریەک لە هەڵبژاردەکانی ئینگلتەرا، ئیسپانیا و فەرەنسا خۆی گەیاندە قۆناخی پێش کۆتایی پاڵەوانێتییەکە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ