ترەمپ: رۆژی شەممە گفتوگۆی راستەوخۆمان لەگەڵ ئێران دەبێت

 

رۆژی دووشەممە 07-04-2025 دۆناڵد ترەمپ، سەرۆکی ئەمریکا لە کۆشکی سپی پێشوازی لە بنیامین نەتەنیاهوو، سەرۆکوەزیرانی ئیسرائیل کرد. ترەمپ لەکاتی قسەکردن بۆ رۆژنامەڤانان لەبارەی ئێران گوتی: "رۆژی شەممە کۆبوونەوەیەکی زۆر گەورەمان هەیە و بە شێوەیەکی راستەوخۆ مامەڵەیان لەگەڵدا دەکەین."

 

ترەمپ گوتی: "لەوانەیە رێککەوتنێک بکەین، ئەمەش زۆر مەزن دەبێت. کۆبوونەوەکەی رۆژی شەممە لە ئاستی باڵایە."

 

پرسیار لە ترەمپ کرا، ئایا وەڵامی سەربازی بۆ لابردنی هەڕەشەی ئەتۆمی لە ئێران دەبێت؟ گوتی: "ئێران نابێت ببێتە خاوەنی ئەتۆم. ئەگەر گفتوگۆکان لەگەڵ ئێران سەریان نەگرت، ئێران لە کێشەدا دەبێت."

 

پرسیار لە ترەمپ لەبارەی ئەو هەڵوێستەی تورکیا کرا کە رایگەیاندبوو دۆخی سووریا سەقامگیر دەکات. ئەو گوتی، پەیوەندییەکی باشی لەگەڵ رەجەب تەیب ئەردۆغان، سەرۆککۆماری تورکیا هەیە و گوتی: "پێموانییە ئەمە ببێتە کێشە."

 

سەرۆکی ئەمریکا گوتی، ئەو دەتوانێت هەر کێشەیەک "چارەسەر" بکات کە ئیسرائیل لەگەڵ تورکیا لەبارەی دەستخستنتی کۆنتڕۆڵی زیاتر لە سووریا هەیەتی.

 

ترەمپ پیرۆزبایی لە ئەردۆغان کرد و گوتی: "ئەو دەستی بەسەر سووریادا گرت، کارێک کە کەس نەیدەتوانی بیکات." 

 

 

ترەمپ غەززەی بە "پارچەیەکی زۆر گرنگی خانووبەرە [عەقارات]" وەسفکرد و گوتی: "زۆر باش دەبێت ئەگەر هێزی ئاشتیخوازی ئەمریکا کۆنترۆڵی غەززە بکات و ببێتە خاوەنی."

 

ترەمپ دووبارە باسی "ناردنە دەرەوەی فەلەستینییەکانی غەززە"ـی لە خاکی خۆیان کرد و گوتی: "لە غەززە زۆنێکی ئازاد دروستدەکەم."

 

ترەمپ هەروەها گوتی: "ئێستا غەززە شوێنێکە کە کەس نایەوێت لێی بژیت."

 

بنیامین نەتەنیاهوو گوتی، دووبارە بنیاتنانەوەی غەززە چەندین ساڵی دەوێت. "من و سەرۆک ترەمپ دیدێکمان بۆ غەززە هەیە و کاری لەسەر دەکەین."

 

لەبارەی بارمتەکانەوە ترەمپ گوتی، ئەو زۆر بە چڕی هەوڵدەدات بارمتەکانی غەززە رزگار بکرێن. "ئەمریکا چاوی لە ئاگربەستێکی دیکەیە، با بزانین چی روودەدات."

 

ترەمپ پەسنی نەتەنیاهووی کرد و گوتی: "ئەو هەوڵی زۆر بۆ رزگارکردنی بارمتەکان دەدات و کارێکی مەزن دەکات." 

 

نەتەنیاهووش گوتی: "من هاوبەشێکی مەزنم هەیە."

 

 

ترەمپ لەبارەی هێرشەکانی ئەمریکا بۆ سەر حووسییەکانی یەمەن کە هاوسۆزییان بۆ حەماس دەربڕیوە گوتی: "بەڕاستی زیانی زۆرمان لێداون و ئازاری زۆرمان داون."

 

ترەمپ گوتی، ئێستا حووسییەکان نازانن چی دەکەن، "ئەمریکا چەندین سەرکردە و شارەزا و پسپۆڕی مووشەکی ئەوانی کوشت."

 

پیت هێگسەس، وەزیری بەرگریی ئەمریکا لە دانیشتنەکە ئامادەبوو و گوتی: "هێرشی سەر حووسییەکان بەردەوام دەبن، تاوەکو رایدەگەیێنن کە چیدیکە هێرش ناکەنە سەر کەشتییە ئەمریکییەکانی دەریای سوور. بە ئێرانیشمان گوتووە پشتیوانی لە حووسییەکان نەکەن."