رێککەوتنی مانەوەی هێزەکانی ئەمریکا لە ژاپۆن درێژدەکرێتەوە

 

 

ئەنتۆنی بلینکن، وەزیری دەرەوەی ئەمریکا رایگەیاند، رێککەوتنی مانەوەی هێزەکانی وڵاتەکەی لە ژاپۆن بۆ ماوەی پێنج ساڵی دیکە درێژدەکەنەوە. بلینکن گوتی: "ئێمە چوارچێوەیەکی نوێ تایبەت بە مانەوەی هێزەکانمان لە ژاپۆن واژۆکرد بەجۆرێك وەبەرهێنانی زیاتر لە کاروباری سەربازی هاوبەشمان بکەین و هاوئاهەنگی بەرگریکردنمان پتەوتر بکەین"

 

درێژکردنەوەی ماوەی مانەوەی هێزەکانی ئەمریکا لەسەر داوای ژاپۆن بوو، ئەوەش لەدوای زیادبوونی نیگەرانی ئەمریکا و هاوپەیمانەکانی لە هەڵکشانی هەژموونی چین لە ناوچەی دەریای باشووری چین و ناوچەی باشووری رۆژهەڵاتی ئاسیا.

 

بەگوێرەی رێککەوتنە نوێیەکە کە بڕیارە ئەمڕۆ هەینی، 7-1-2022 واژۆ بکرێت، مانەوەی هێزەکانی ئەمریکا لە ژاپۆن تاوەکو کۆتایی ساڵی 2026 بەردەوام دەبێت و تێیدا ژاپۆن بەڵێنیداوە ساڵانە ملیارێك و 820 ملیۆن دۆلار خەرجیی مانەوەی هێزەکانی ئەمریکا بدات.

 

لە ساڵی 1957وە، ئەمریکا گەورەترین بوونی سەربازی دەرەکی لە ژاپۆندا بە زیاتر لە 55 هەزار سەرباز و  گەورەترین یەکەی دەریایی هەیە.

 

لە سەردەمی ئیدارەی ترەمپدا، پەیوەندیی نێوان ئەمریکا و هاوپەیمانەکانی لە ئەوروپا و ئاسیا لەنێویاندا ژاپۆن بە قۆناخێکی ئاڵۆزدا تێپەڕین، ئەوەش لەدوای رەخنەی تووندی ترەمپ لەو وڵاتانە بە کەمی پارەی تەرخانکراو بۆ خەرجی هێزەکانی ئەمریکا لە وڵاتەکانیان.