ئەمریکا خاڵی پشکنینەکان بۆ ئەمریکییە بە رەگەز ئێرانییەکان توندوتۆڵ دەکات

 

نیگا حیکمەتی، کەسێکی بەرەگەز ئێرانییە و دەڵێت، خۆی و مێردەکەی و دوو منداڵەکەی گەیشتوونەتە سەر سنووری ئەمریکا و کەنەدا، ویستوویانە بگەڕێنەوە ویلایەتی واشنتن، کاتێک سەیری ناسنامەکەیان کردوون کە لەسەری نووسراوە بەرەچەڵەک ئێرانییە، ئۆتۆمبێلەکەیان وەستاندوون و هەرچواریان بردوونەتە ژوورێک بۆ ماوەیەک لێپرسینەوەیان لەگەڵدا کردوون.

 

نیگا حیکمەتی یەکێکە لەو 60 ئەمریکییە بەرەچەڵەک ئێرانییەی  بۆ راگەیاندنەکانی ئەمریکا قسەیان کردووە و  پێیانوایە لەلایەن ئەفسەرانی لێکۆڵەرەوە هەراسانکراون.

 

ئەمریکا لە هەموو روویەکەوە رێوشوێنی تووندی گرتووەتە بەر و ئامادەکاریی باشی پێوە دیارە بۆ رووبەڕووبوونەوەی هەر هێرشێک لەلایەن ئێرانەوە وەکو تۆڵەکردنەوە لەبەرامبەر کوشتنی قاسم سولەیمانی کە رۆژی هەینی لەگەڵ ئەبومەهدی موهەندیس لە فرۆکەخانەی بەغدا بە فڕۆکەی بێفڕۆکەوان کرانە ئامانج.