لە هەولێر پڕۆژەیەک بۆ ئاودانی دارستانە دەستکردەکان دروست دەکرێت

رووداو - هەولێر

پڕۆژەی ئەکو پڕۆژەیەکە بۆ رێگریکردن لە گۆڕانی کەشوهەوا لە هەولێر کە ئاوی قورسی ماڵان پاکدەکاتەوە بۆ ئاودانی دارستانە دەستکردەکان، رۆژانە لە رێگەی 20 تەنکییەوە توانای پاککردنەوەی نزیکەی 340 مەتر سێجا ئاوی هەیە.

شەیما فەرامەرز، بەڕێوەبەری پڕۆژەکەیە و بە رووداوی گوت، "بۆ پڕۆژەکە سوودمان لە ئاوی زێرابی گەڕەکی 5ی حەسارۆک وەرگرتووە، رۆژانە لە رێگەی پڕۆژەکەوە دەیپاڵێوین و بۆ ئاودانی داری دارستانەکان سوودی لێوەردەگرین."

ئەم پڕۆژەیە یەکەم پڕۆژەی ریسایکلینی ئاوی قورسی ماڵانە، رێکخراوی هەسار بە هاوئاهەنگیی رێکخراوی یونسێف لە ساڵێکدا لەسەر شەقامی 120 مەتریی هەولێر بە تێچووی نزیکەی 30 هەزار دۆلار دروستیان کردووە، پڕۆژەکە رۆژانە توانای ئاودانی 300 هەزار داری هەیە.

گەشبین ئیدریس، سەرۆکی رێکخراوی هەسار لەبارەی پڕۆژەکەیانەوە گوتی، "ساڵانە بەهۆی گۆڕانکارییەکانی کەشوهەوا بەردەوام کێشەی کەمئاویمان بۆ دروست دەبێت و بۆ ئاودانی دارەکانیش لێرە سوود لە ئاوی ژێر زەوی وەردەگیرێت. بۆ پاراستنی ئاوی ژێر زەوی ئەم پڕۆژەیەمان دروستکردووە تاوەکو رێگری لە گۆڕانی کەشوهەوا بکەین."

بڕیارە قۆناخی دووەمی 'پڕۆژەی ئەکو' تاوەکو کۆتایی ئەمساڵ، لە پارکی سامی عەبدولڕەحمان جێبەجێ بکرێت، کە توانای پاککردنەوەی 800 مەتر سێجا ئاوی قورسی دەبێت.