رووداو دیجیتاڵ
پاپای ڤاتیکان لە نوێترین لێدوانیدا لەبارەی هێرشی سەربازیی رووسیا بۆسەر ئۆکراینا دەڵێت، ئەوە "ئۆپەراسیۆنی سەربازی نییە، بەڵکو جەنگە"، ئۆکرایناش بە "وڵاتێکی شەهید" ناودەبات کە "رووباری خوێن و فرمێسکی تێدا دروستبووە".
لێدوانەکانی پاپا فرانسیس، پاپای ڤاتیکان لە وەڵامی راگەیێندراوەکانی کرملن، کۆشکی سەرۆکایەتیی رووسیادایە کە جەخت لەوە دەکەنەوە داگیرکردنی ئۆکراینا "ئۆپەراسیۆنێکی سەربازیی تایبەتە" و مەبەست لێی "داماڵینی ئۆکراینایە لە چەک".
پاپای ڤاتیکان رایگەیاندووە، "لە ئۆکراینا رووباری خوێن و فرمێسک دروستبووە. ئەمە هەر تەنیا ئۆپەراسیۆنێکی سەربازی نییە، بەڵکو جەنگێکە کە بەرەو مەرگ، کاولکاری و بەدبەختی و نەگبەتی دەمانبات".
هەفتەی رابردوو پاپای ڤاتیکان داوای کۆتاییهێنان بە جەنگی ئۆکراینا و کردنەوەی رێگەی تایبەت بە گەیاندنی هاوکاریی مرۆیی و دەربازبوونی خەڵکی کرد.
رۆژی 24-02-2022 ڤلادیمیر پووتین، سەرۆکی رووسیا فەرمانی بە سوپای وڵاتەکەی کرد هێرش بکەنە سەر ئۆکراینا؛ ئەمڕۆ 11 رۆژە هێرشە سەربازییەکە بەردەوامە و بەهۆیەوە زیانی گیانی و ماددی زۆر کەوتووەتەوە و ژمارەیەکی زۆریش لە خەڵکی ئەو وڵاتە ئاوارە بوون.
بەپێی ئامارەکانی نەتەوە یەکگرتووەکان، تاوەکو ئێستا زیاتر لە 1.5 ملیۆن کەس لە ئۆکرایناوە ئاوارەی وڵاتانی دراوسێ و جیهان بوون، هەروەها لانیکەم 351 هاووڵاتیی سڤیلیش کوژراون و سەدان هاووڵاتیی سڤیلی دیکەش برینداربوون.
سوپاکانی رووسیا و ئۆکرایناش ئاماری جۆراوجۆر لەبارەی کوژران و برینداربوونی سەربازانیان دەخەنەڕوو؛ ئەمەش جگە لەو زیانە ماددیە گەورەی بەر ژێرخانی ئابووریی ئۆکراینا کەوتووە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ