ئانهوی؛ قیبلەی ژیریی دەستکرد و وزەی خاوێن لە چین

 

 

ئانهوی لە پلەی دەیەم دێت بۆ بەرزی ئابووری و لە پێشانگەکانی چین لە تەکنەلۆجیا و ژیریی دەستکرد و وزەی خاوێن کە داهاتی پاری 4.7 ترلیۆن یوان بووە.

 

هۆکاری سەرەکی پێشکەوتنی ئەم هەرێمە بۆ هەڵکەوتەی جوگرافیا، توانا، کرانەوە و ژێرخانی پێشکەوتوو، هاوکاری بازرگانی و بازرگانیی بیانی دەگەڕێتەوە.

 

پان فێنگ، سەرۆکی بەشی پیشەسازی و تەکنەلۆژیای زانیاری ئەنهوی بە رووداوی گوت، "لە روانگەی حکومەتەوە، ئێمە هەوڵ بۆ پەرەپێدانی خێفێ دەنێین لە دوو خاڵدا: یەکەم، حکومەت جیهانبینییەکی زۆر پێشکەوتووی هەیە و میتۆدۆلۆژی گەشەپێدانی باشی هەیە، ئێمە هانی کۆمپانیاکان دەدەین کە چەمکی نوێ وەربگرن کە هاوتەریبن لەگەڵ رەوتی جیهان بۆ پەرەپێدانی گەشەپێدانی پیشەسازییەکەمان، بۆ نموونە لە ساڵانی رابردوودا، پێشخستنی ئینتەرنێتی پیشەسازی و گۆڕینی دیجیتاڵی زۆر یارمەتیدەرە بۆ کارگەکانمان بۆ باشترکردنی کارایی و بەرهەمهێنانی کوالیتی نوێ".

 

چین رابەرایەتیی جیهان دەکات لە ژیریی دەستکرد، بە بەرهەمهێنانی چەندین رۆبۆت و ئامێر و تەکنەلۆژیای و پڕۆژە و پڕۆگرامی زیرەک؛ بە بەهای زیاتر لە 150 ملیار دۆلار، بەڵام هێشتا دیار نییە ئاخۆ جیهان متمانەی تەواو بە ژیریی دەستکردی چین و تەکنەلۆژیاکەی دەکات یان نا؟

 

بەپێی راپۆرتی PWC ئوسترالی لە پێنج ساڵی داهاتوو، ژیریی دەستکرد 300 ملیۆن هەلی کار لەنێودەبات و لە چین لە هەر پێنج کەسێک، کەسێک بێ کار دەمێنێتەوە. گەورە بەرپرسانی ژیریی دەستکرد ئاوا باسی داهێنانەکانیان بۆ رووداو کرد.

 

 

داوێی دوان، بەڕێوەبەر و جێگری سەرۆکی باڵا و بەڕێوەبەری دارایی کۆمپانیای ئایفلایتێک بۆ رووداوی باسکرد، "فەلسەفەی ئێمە دروستکردنی جیهانێکی باشترە، بە تەکنەلۆژیای AI و پێموایە زۆرێک لە کۆمپانیاکانی تەکنەلۆژیا، فەلسەفەی هاوشێوەیان هەیە، زانست بۆ چاکە، زانست بۆ چاکە. وەک iFLK ئێمە کێشەمان هەیە لە فرۆشتنی بەرهەمەکانمان لە ئەمریکا، کارکردنیش وەک لە چین جێگەی رەزامەندی نییە. 25% زیاتری بەرهەمەکان ناتوانرێت بنێردرێت بۆ ئەمریکا".

 

چین رابەرایەتیی جیهان دەکات لە زیرەکی و ژیریی دەستکرد لە بەرهەمە تەکنەلۆژیا و ئەلیکترۆنییەکان، هەر بەوەشەوە نەوەستاوە ئێستا لە ئامێرە گەورەکان و ئامێری بارهەڵگر و بەرزکەرەوە، ئەوان زیاتر لە رێژەی 30٪ ژیریی دەستکرد بەکاردەهێنن، بەجۆرێک زۆربەیان پێویستیان بە شۆفێر نییە. 

 

هەرچەندە چین لە ریزبەندی 13یەمین دێ بۆ پیسکردنی ژینگە لە جیهان، بەڵام خاوەن زۆرترین بەرهەمی وزەی خاوێن و وزەی نوێبووەوەیە، بەجۆرێک کە سێ بەشی سۆلار پانێلەکانی دونیا لە چین بەرهەم هاتوون و 31٪ی ئۆتۆمبێلی کارەبایی جیهان لە چینن.

 

چین بازاڕی پاتری لیسیۆمی قۆرخ کردووە کە 63.3٪ی پشکی بازاڕی جیهانی بۆ خۆی مسۆگەرکردووە، ئەمریکا ئەم هەنگاوەی چین بە مەترسی دەزانێت، کە ئێستا بارگاویکردنەوەی یەدەگی کارەبایی بۆ ئامێر و ئۆتۆمبێل و ماڵەکانیش بە قەبارە و جۆری جیاواز هەیە؛ ئێستا چین ئامێری گەورەی بەرزکەرەوە و بیناسازیشی بە کارەبا دروستکردووە.

 

 

جەیمس وو، جێگری سەرۆکی باڵای کۆمپانیای سونگرۆ بە رووداوی گوت، "لەبەرئەوەی ئێمە کۆمپانیایەکی جیهانین، نەخشەی ئێمەش جیهانییە. ئێمە نەک تەنیا لە ئاستی جیهانیدا فراوانتر دەبین بە رۆژهەڵاتی نێوەڕاستیشەوە، بەڵکو لە ئابوورییە جیاوازەکانیش لە سەرانسەری جیهاندا [فراوان دەبین]، کە لە ئێستادا لە عێراقدا نییە".

 

دەیڤید ژاو، جێگری سەرۆکی باڵای کۆمپانیای سونگرۆ ئاماژەی دا، "بەرهەمەکانمان بۆ بازاڕی جیهانی دیزاین کراون و لە ئاستی جیهانیدا رووبەڕووی داواکاری جۆراوجۆر دەبینەوە، لەوانە پلەی گەرمی بەرز و نزم. هەروەها پێویستی گەرمکردنی زیاد لە زستاندا. بۆیە لە چەند دەیەی رابردوودا توێژینەوە و پەرەپێدانی بەرفراوانمان ئەنجامداوە بۆ گونجاندنی بەرهەمەکانمان لەگەڵ ژینگە جیاوازە جیهانییەکان، لەوانەش ئاڵنگارییە ژینگەییەکانی تۆڕی کارەبا. لە ئێستادا بە پشتبەستن بە بەکارهێنانی بەرهەمەکان، 500GW بەرهەمی فۆتۆ ڤۆڵتایکمان لە سەرانسەری جیهاندا داناوە".

 

لە ئانهوی لە ساڵی 2023 دوو ملیۆن و 400 هەزار ئۆتۆمبێلی کارەبایی بەرهەم هێنراوە، ئەمەش وایکردووە کە 500 کۆمپانیای بیانی و ئەنتەرپڕایز لەم هەرێمە جێگیربن، هەروەها کۆمپانیاکانی ئەم هەرێمە لە 140 وڵات ئۆفیسیان هەیە و کاردەکەن. فۆلکس واگنی ئەڵمانی یەکێکە لە نموونەکان، کە رۆژانە لەم کارگەیەی 300 ئۆتۆمبێل بەرهەم دێن کە تەنیا 300 کارمەند و 200 ئەندازیار کاری تێدا دەکەن و زۆرترین کارەکان لە رێی رۆبۆت و ژیریی دەستکردەوە ئەنجامدەدرێن، ئەمەش وایکردووە لە کەمترین کاتدا زۆرترین بەرهەمیان هەبێت. ئۆتۆمبێلەکان بۆ ئەمریکا و ئەورووپا هەناردە دەکرێن.

 

تۆماس شینکە، بەرپرسی بەشی هەیکەلی ئۆتۆمبیڵ، VWA بۆ رووداوی باس دەکات، "بەڵێ، ئێمە ئۆتۆمبێل لە کەمتر لە 20 کاژێردا دروست دەکەین، کاتێک تۆ ئەوەندە ژیریی خۆکارت نییە، پێویستت بە کاتی زیاترە، ئێمە ئەوەندە کەسمان نییە، خەڵکەکەش بنەمای ئەو کاتەن کە کار دەکەن، بەڵام دواتر کاتێک دەست دەکەین بە کارکردن تا ئۆتۆمبێلەکە ئامادە دەبێت تا دەچنە دەستی کڕیارەکان، لە کەمتر لە دوو هەفتەیە".

 

 

رۆبۆت بۆ کاری رۆژانە و وەرگێڕی زیرەک بۆ 20 زمانی جیهان لە هەمان کاتدا و شاشەی زیرەک بۆ کۆنترۆڵکردنی داتای گەورە و ئامێری زیرەک بۆ پەیوەندی و گواستنەوەی بەرهەمە هەنووکەیەکانن لە چین.

 

ژووری زیرەکی هاتووچۆ لە هۆڵێکی شاری خێفێ لە هەرێمی ئانهوی چین هەیە، کە بەتەنیا لەو هۆڵە دەتوانی چاودێری هەرچی قەرەباڵغی و رێگای هاتووچۆیە لە هەموو چین بکەیت، ئەمە لەکاتێکدا چین خاوەنی زیاتر لە 500 ملیۆن ئۆتۆمبێلە و درێژترین رێگای شەمەندەفەرە لە جیهان، لە ژوورێکی زیرەکەوە دەتوانی بزانی لە چ شەقامێک و لە چ رێگایەکی خێرا یان ئۆتۆبان کێشە هەیە و چ کێشەیەکە و چۆنیەتی چارسەرکردنیشی.

 

ڤیتۆر مارتینز، بەرپرسی سەنتەری تەکنەلۆژیای پێوانە VWA بە رووداوی راگەیاند، "لە ژیریی دەستکردەوە، ئێمە لە داتاوە دەست پێدەکەین، چونکە دەمانەوێت داتاکان بەکاربهێنین، بۆ شیکارییەکانی داهاتوو، دەڵێم 30% پێشتر بەکاریدەهێنین".

 

چین خاوەنی ریکۆردی جیهانییە لە کومپیوتەری کوانتەم و کوانتەم فۆتۆن و هەروەها دابەشکردنی 1000 کم فایبەر ئۆپتیک و ئۆپتیک کوانتەم، ئەمە جگە لە وزەی خاوێن و کارەبا،

 

 

ئەمە یەکێکە لەو تکسیە بێ شوفێرانەی کە چین 400 دانەی لێیان هەیە، کێشی تەنیا 500 کیلۆگرامە و دەتوانێت دوو سەرنشینی کەمتر لە 90 کیلۆگرامی هەڵبگرێت، لە 15 شاری چین وێستگە و هێڵی ئەم جۆرە تاکسیانە بەردەستن و چین ئامانجیەتی کە لە 10 ساڵی داهاتوو لە هەر 300 شارە گەورەکەی تاکسی یان فڕۆکەی بێفڕۆکەوان بەردەست بن و خەڵک بتوانن لە رێگەیەوە گەشت بکەن.

 

لی شیاونا، سەرۆکی هەرێمی رۆژهەڵاتی چین لە دەزگای زیرەکی ئێهانگ بۆ رووداو وا باسی کرد، "تائێستا لەسەر ئاستی جیهان زیاتر لە 45 هەزار جار فڕینمان کردووە لە زیاتر لە 15 وڵاتدا، لە راستیدا گواستنەوە لە رێگەی ئاسمانییەوە زۆر گونجاوە. زۆر بەکارمان نەهێناوە لەبەرئەوەی بودجەکەی زۆر بەرزە، ئەم ساڵ دەمانەوێت ئەم بەرهەمە بخەینە بازاڕ، لە راستیدا ئێمە ئێستا دەتوانین خەڵک لەسەر فڕۆکەی بێفڕۆکەوانەکە بگەیێنین، تەنیا پێویستە مۆڵەت بۆ گەیاندنی خەڵک وەربگرین. لەبەرئەوەی درۆنەکەمان هیچ شۆفێرێکی نییە هەمووی لە سەنتەری کۆنترۆڵەوە کۆنترۆڵ دەکرێت".

 

من، مەهدی فەرەج، ئێستا کە لە چینم لەگەڵ رۆبۆت یاریی دامە دەکەم. یارییەکە لێرە لە چین ناوی وەیچییە، لە دامەی لای خۆمان ئاڵۆزترە، ئەگەرچی زۆر سەرم لێی دەرناچێت، بەڵام ئیتر ئەگەر حەزت لێبێ لەگەڵ رۆبۆتەکەدا یاریی دەکەیت.