رووداو دیجیتاڵ
دوو بەربژێری کورد بۆ پەرلەمانی بەریتانیا لەسەر هەردوو پارتی پارێزگاران و کار خۆیان بەربژێر کردووە، یەکێکیان کە خەڵکی هەرێمی کوردستانە کورسییەکەی لەدەستدا و ئەوی دیکەیان کورسییەکەی بردەوە.
یاسەمین ئەترووشی، تەمەن 29 ساڵ کوردێکی دانیشتووی بەریتانیایە و لەوێ لەدایکبووە. ئەو لە بازنەی باکووری وێرینگتن لەسەر پشکی پارتی پارێزگاران بەربژێر بوو، هەرچەندە 6 هەزار و 486 دەنگی بەدەستهێنا، بەڵام کورسییەکەی لەدەستدا و دەرنەچوو.
بەربژێرێکی دیکەی بە بنەچە کورد ناوی فێریاڵ کلارکە. تەمەنی 45 ساڵە و خەڵکی مەلەتیی باکووری کوردستانە لە بازنەی باکووری ئینفیڵد بەربژێر بوو لەسەر پشکی پارتی کار، فێریاڵ دەنگی یەکەمی بازنەکەی بەدەستهێناوە و کورسییەکەی مسۆگەر کرد.
فێریاڵ کلارک، بەربژێری پارتی کار لە بازنەی باکووری ئینفیڵد، بۆ جاری دووەم لە بازنەکەی خۆی سەرکەوتنی بەدەستهێنا و بووەوە ئەندامی پەرلەمان. ژمارەی دەنگەکانی فێریاڵ 21 هەزار و 368 دەنگ بوون.
بەگوێرەی ئەنجامە بەراییەکانی هەڵبژاردنی گشتیی بەریتانیا، پارتی کار گەورەترین سەرکەوتنی لە مێژووی پارتەکە بەدەست هێنا و بەجیاکردنەوەی 90٪ی دەنگەکان؛ 394 کورسی یەکلاکردووەتەوە و بەمەش زۆرینەی پەرلەمانی بەدەستهێنا.
رۆژی پێنجشەممە، 4ـێ تەممووزی 2024، یاسەمین ئەترووشی بە تۆڕی میدیایی رووداوی راگەیاند: "من یەکەم بەربژێری کوردم بۆ هەڵبژاردنی پەرلەمان نوێنەرایەتیی پارتی پارێزگارانی بەریتانیا دەکەم. من خۆم لە بەریتانیا لەدایکبووم و گەورەبووم. بەڵام شانازی بە پاشخانە کوردییەکەمەوە دەکەم."
باوکی یاسەمین، خەڵکی دهۆکە و پزیشکە. دایکیشی خەڵکی کۆیەیە و دەرمانسازە. یاسەمین، خۆیشی دەرچووی زانکۆی ئۆکسفۆردی بەریتانیایە.
لە هەڵبژاردنی پێشووی بەریتانیا کە ساڵی 2019 بەڕێوەچوو؛ دوو کورد توانییان بچنە پەرلەمان. ئەوانیش فێریاڵ کلارک و نەدیم زەهاوی بوون. زەهاوی لەسەر پارتی پارێزگاران چووە پەرلەمان و دواتر پۆستی باڵای لە حکومەت پێیدرا.
بەگوێرەی ئەنجامە بەراییەکان، چاوەڕێ دەکرێت زۆرترین ژن لەم خولەی پەرلەمانی بەریتانیا ببنە پەرلەمانتار، کە تائێستا 242 ژن کورسیی خۆیان لە پەرلەمان مسۆگەر کردووە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ